Histori - Shqiptari i Italisë

Të akuzuarit, pjesëtarë të dy familjeve shqiptare në Lombardi. U sekuestrohet edhe regjistri i llogarive që tregon të ardhurat marramendëse të siguruara nga furnizuesi i drogës

Romë, 21 shtator 2017 – Karabinierët e Milanos kanë arrestuar në provincën e Milanos, Vareses dhe Torinos dhjetë persona, nëntë shqiptarë e një italian, me moshë nga 22 deri në 54 vjeç, të gjithë të akuzuar për trafik e mbajtje të paligjshme të drogave të ndryshme, marihuanë, heroinë e kokainë.

Arrestimet u kryen pas tetë muajve hetime intensive mbi dy familje shqiptare të cilave iu sekuestrua edhe një regjistër në të cilin ishin raportuar llogaritë e një prej furnizuesve të drogës. Analizimi i të dhënave të gjetura në të ka treguar se nga droga e qarkulluar në tetë muaj ishin fituar mbi dy milionë euro.

Shitja “me pakicë” e drogës bëhej në një bar në qendër të Villa Cortese (provinca e Milanos), nga ora 12 deri natën vonë, dhe një person i grupit arrinte të bënte deri 40 shitje në ditë.

Rrëfimi i një të riu të ndaluar nga karabinierët menjëherë pasi kishte blerë një dozë nxori në dritë detajet: “Sapo hyra në bar mu afrua një prej dy djemve që i njihja si fytyrë, ai e kuptoi menjëherë pse kisha shkuar aty. Më dha gjysmë grami kokainë e unë i dhashë 45 uro. Ndërkohë baristi më përgatiti kafenë. E piva, pagova dhe dola. Nuk kam numër telefoni të personit që më dha drogën sepse e dija prej një miku që mund ta gjeja aty nga mesdita. Sa herë i kam kërkuar drogë, gjithnjë e ka nxjerrë nga xhepi e ma ka dhënë. Brenda barit ka edhe një person të dytë të cilit i drejtohet djali që më jep drogën”.

Nga hetimet doli se njëra prej dy familjeve, - nëna, babai dhe tre fëmijët (me përjashtim vetëm të më të voglit, akoma në moshë të mitur) - ishte tërësisht e përfshirë në këtë aktivitet të paligjshëm e çdo pjesëtar kishte një detyrë të caktuar.

Duke ndjekur linjën e furnizimit të kësaj familjeje, karabinierët arritën të gjejnë edhe një familje të dytë, edhe kjo shqiptare, që duke vepruar pak a shumë njësoj, bënte furnizimn e familjes së parë, dhe njëkohësisht furnizonte me drogë edhe fshatra të tjerë të provincës së Milanos si San Giorgio su Legnano, San Vittore Olona, Legnano dhe Cerro Maggiore.

Të arrestuarit janë mbyllur në burgun e Busto Arsizios dhe në San Vittore të Milanos.

Nga ekrani i Top Channel, Knut Fleckenstein foli mbi çështje të ndryshme rreth zhvillimeve politike në vend dhe rreth marrëdhënieve mes Shqipërisë dhe Evropës

Tragjedi në Casale Monferrato. Një shqiptar ka vrarë pas një grindjeje të egër ish të dashurën, 48 vjeçare. Të thirrur nga fqinjët forcat e rendit gjejnë akoma me thikë në dorë vrasësin por për gruan është tepër vonë

Romë, 15 shtator 2017 – Burra që urrejnë gratë. Deri në atë pikë sa t’u marrin edhe jetën. Ka ndodhur edhe sot pasdite në Casale Monferrato të Alessandrias. Kujtim Hasanaj, 49 vjeç ka therur për vdekje ish bashkëjetuesen e tij, Elena Seprodi, 48-vjeçare rumune, që në një nga ndërhyrjet e fundit publike të lëna në facebook shoqëronte një foto të vetën pikërisht me shprehjen “No alla violenza sulle donne”.

Nga informacionet e para, rreth orës 15 policia e karabinierët kanë shkuar në një pallat të rrugës Asti pasi janë lajmëruar për një zënie të egër. Kur kanë mbërritur në apartament forcat e rendit kanë gjetur pa jetë gruan ndërsa burri është bllokuar ndërsa kishte akoma amën e krimit, një thikë, në dorë.

Tragjedia duket se ka pasur shkak grindjen e radhës – për arsye parash apo tradhëtish të shkuara – mes burrit e gruas që prej disa kohësh nuk jetonin më bashkë.

 

Me 78 vota pro dhe 51 kundër, kabineti i ri i qeverisë “Rama 2” dhe programi i saj politik mori votëbesimin e Kuvendit. Nga 136 ligjvënëns që ishin në sallë, 7 nuk votuan.
Votimi u zhvillua rreth orës 7 të mëngjesit të sotëm, pas thuajse 22 orëve fjalimesh e debatesh rreth programit.
Që qeveria Rama 2 të fillojë punën, duhet të bëjë edhe betimin para presidentit të Repulikës Ilir Meta. Ceremonia e betimit pritet të bëhet gjatë ditës së sotme.    

 

 

 

“Nëse kjo nuk bëhet, askush nga ne nuk fiton asgjë. Shqipëria po, humbet, humbet shumë më shumë se sa thjesht një pjesë votuesish në zgjedhjet parlamentare. Humbet lidhjen morale të bijve të vet me vendin amë”

Tiranë, 11 shtator 2017 – Gjatë paraqitjes së programit qeveritës për vitet e ardhshme, kryeministri Edi Rama nuk la pa përmendur emigrantët.

Ai u bëri thirrje palëve për t’u bërë bashkë kur është fjala për çështje identitare, për ngritjen e emrit të Shqipërisë në arenën ndërkombëtare dhe sa herë “duhen mbrojtur vlerat, liritë dhe të drejtat e çdo shqiptari, të çdo fëmije me gjakun tonë, kudo që jeton mbi tokë”. Në këtë pikë, ngriti problemin e votës së emigrantëve duke kërkuar bashkëpunimin e të gjithëve për të bërë të mundur që në vitin 2021 ata të mund të votojnë atje ku jetojnë.

Programi qeveritës e konsideron diasporën “aleate strategjike në marrëdhëniet diplomatike të Shqipërisë” dhe “shtresë vitale e kombit”. Me shqiptarët jashtë Atdheut synohet të krijohet një marrëdhënie e strukturuar. Përveç reformës institucionale dhe ligjore për t’u dhënë të drejtën e votës shqiptarëve në botë, do të krijohet edhe një Agjenci Shtetërore e Emigracionit, që do të fillojë regjistrimin e tyre, kudo ku jetojnë. Parashikohet gjithashtu krijimi një Fondi për këtë qëllim. 

Ja fjalët e kryeministrit mbi këtë pikë:

A e kemi ne, i nderuar Kuvend i Shqipërisë, luksin që të mos bëhemi bashkë për gjëra kaq të mëdha sa vlerat tona identitare dhe sfidat tona, si komb dhe si shtet në Europën ku jetojmë?
Po edhe sikur të çirremi e të shqyhemi për pikëpamjet tona politike dhe për argumentet tona mbi taksat apo mbi koncesionet, kjo nuk duhet të na pengojë të gjejmë të njëjtin zë dhe të qëndrojmë krah për krah, kur duhet folur për Shqipërinë, në emër të vendit tonë, të kombit tonë; kur duhet folur për integrimin europian të Shqipërisë dhe duhen mbrojtur vlerat, liritë dhe të drejtat e çdo shqiptari, të çdo fëmije me gjakun tonë, kudo që jeton mbi tokë.
Një shembull ulëritës:

Flasim dhe flasim, nuk reshtim, për shqiptarët që largohen, por a do fillojmë të flasim pa humbur kohë dhe për fuqinë vendimmarrëse të tyre në këtë vend, e cila do t’i lidhë ata kudo që të jenë, edhe moralisht, përveçse shpirtërisht dhe mendërisht siç janë të lidhur sot me Shqipërinë?
E kam fjalën për jetësimin e të drejtës së votës të çdo shqiptari në emigracion, duke i mundësuar pjesëmarrjen në zgjedhje drejt e nga aty ku banon, kujtdo ndër bijtë e bijat e këtij populli që dëshiron të zgjedhë parlamentin dhe qeverinë e vendit të vet.
A nuk është kjo një gjë tjetër e madhe që na bashkon dhe për të cilën të gjithë flasim prej kaq vitesh, duke fajësuar në fund të çdo mandati njëri-tjetrin pse nuk u bë edhe kësaj radhe?
Ju ftoj të gjithëve të mos humbasim më kohë, por të ulemi dhe ta bëjmë së bashku realitet votimin e emigrantëve në zgjedhjet politike të vitit 2021.
Kush prej nesh fiton dhe çfarë fiton konkretisht, nëse kjo nuk bëhet? Absolutisht, askush nuk fiton asgjë. Shqipëria po, humbet, humbet shumë më shumë se sa thjesht një pjesë votuesish në zgjedhjet parlamentare. Humbet lidhjen morale të bijve të vet me vendin amë.

Pas një ndjekjeje në det është bllokuar një jaht me flamur amerikan

Tiranë, 6 shtator 2017 – Në Vieste të provincës së Foggias, Guardia di Finanza ka sekuestruar 3 tonë e 992 kg marihuanë pas një operacioni ndërkombëtar antitrafik droge në të cilin morën pjesë Policia shqiptare, ajo italiane dhe GdF.

Lajmin e dha Policia e Shtetit që njoftoi sot se, në orët e para të mëngjesit nga ana e GdF italiane u bë i mundur ndalimi dhe sekuestrimi i një jahti me flamur të Shteteve të Bashkuara.

Bllokimi i mjetit lundrues u bë i mundur falë ndjekjes në det e nga ajri.

Ekuipazhi i mjetit lundrues përbëhej nga tre shqiptarë me inicialet F.M., E.V. dhe E.M. që u arrestuan. 

Mjeti lundrues u kap në ujërat territoriale italiane në zonën e Viestes në provincën e Foggias. Hetimet paraprake tregojnë se ky mjet lundrues nuk ka shkelur ujëra shqiptare.

Policia e Shtetit ka bërë të ditur se po bashkëpunon ngushtë me forcat italiane si dhe po shkëmben informacione intensivisht me Policinë malazeze për zbardhjen e këtij trafiku.

Pala italiane, që ende nuk ka dhënë detaje mbi këtë operacion të fundit, ka paralajmëruar një konferencë për shtyp për nesër në mëngjes.

 

Ne shqiptarët pretendojmë me të drejtë që të trajtohemi mirë dhe me dinjitet sa herë që kapërcejmë kufirin apo në të gjitha ato shtete ku punojmë e jetojmë si emigrantë, në Greqi, Itali, Gjermani, Angli etj. Por pse nuk mendojmë se ne vetë duhet të çlirohemi së pari nga paragjykimet që kemi ndaj të tjerëve?
Nga Irma Kurti  

E kisha fshirë nga mendja “Nuk jam racist, por ...”. Me dashje. E dëgjoja aq shpesh në kanalin televiziv italian Rete 4, në programin “Dalla vostra parte”(Nga ana juaj), drejtuar nga gazetari Maurizio Belpietro që transmetohej nga e hëna deri të premten. Në objektiv fokusoheshin njerëz të zemëruar nëpër sheshe, pjesa më e madhe e të cilëve e fillonin diskutimin për flukset e emigrantëve në brigjet e Italisë me shprehjen: ”Nuk jam racist, por...” Ajo që më indinjonte ishte pjesa e dytë e fjalisë që vijonte pak a shumë kështu: “mjaft me emigrantët” / “nuk i duam më” / “emigrantët vijnë këtu që t’i mbajmë ne” / “ata duhet të kthehen në vendin e tyre” etj.

Programi përqendrohej kryesisht në krimet e kryera nga emigrantët në Itali. Më nervozonte trajtimi i njëanshëm i problemit. Kur ndodhte që të ishte i ftuar në studio ndonjë emigrant ia ndërprisnin fjalën pa e lënë të shprehte mendimin deri në fund. Reagoja dhe ngrija zërin brenda mureve të shtëpisë, por zëri im s’mbërrinte deri në veshët e protestuesve ndaj një ditë vendosa të mos e ndjek më programin e, bashkë me të, të mos dëgjoj as shprehjen: “Nuk jam racist/raciste, por...”.

Këto radhë nuk do të shkruheshin sikur para pak kohësh të mos lexoja në shtypin shqiptar një histori që fliste për një vajzë të dashuruar me një djalë me ngjyrë nëLondër dhe për faktin se familja e saj e kishte mohuar atë dhe foshnjen, frut i dashurisë së të rinjve.

Artikullin e publikuar në rrjetin social e shoqëronin komente që villnin vrer dhe “demaskonin” zgjedhjen e vajzës duke e etiketuar me lloj-lloj sharjesh atë dhe djaloshin me ngjyrë. Më tronditën vulgaritetet, mungesa e tolerancës dhe e emancipimit të shumë moralizuesve që merrnin përsipër të tregonin se kë është mirë të dashurosh dhe kë jo. Por ç’ka më la pa fjalë ishte fakti që plot bashkëkombas të mi i fillonin komentet me shprehjen: “Nuk jam racist/raciste, por ...”.  Pasonin fyerjet e rënda ndaj djaloshit me ngjyrë, nga “majmun” e deri tek “lëkura që vjen erë”.

Këtë radhë shprehjen “Non sono razzista, ma...” e gjeta në gjuhën shqipe: “Nuk jam racist por...”. Efekti që prodhon tek unë është i njejtë.

Ndërsa ne shqiptarët pretendojmë me të drejtë që të trajtohemi mirë dhe me dinjitet sa herë që kapërcejmë kufirin apo në të gjitha ato shtete ku punojmë e jetojmë si emigrantë, në Greqi, Itali, Gjermani, Angli etj., a nuk mendojmë se ne vetë duhet të çlirohemi së pari nga paragjykimet që kemi ndaj të tjerëve?

Kemi paragjykime ndaj vëllezërve të një gjaku, ndaj atyre që s’kanë të njejtën ngjyrë me lëkurën tonë, ndaj atyre që kanë tjetër orientim seksual, ndaj të tjerëve që kanë zgjedhur të jetojnë pa ndjekur modelin standard të të jetuarit që kemi ne në mëndje. Nëse ne vetë s’mundemi t’i flakim këto paragjykime e mbetemi peng i tyre, përse atëhere e kemi kaq lehtë të dënojmë me ashpërsinë më të madhe çdokënd që na trajton pa respekt, që na paragjykon vetëm pse jemi shqiptarë?

Një mentalitet më i hapur do të na ndihmojë të kuptojmë se çdo qënie njerëzore pavarësisht nga gjinia, raca, ngjyra e lëkurës, prejardhja kombëtare dhe sociale është unike në llojin e vet dhe si e tillë duhet respektuar.

Shprehja: “Nuk jam racist, por...” në çfarëdo gjuhe të shqiptohet është vetëm një koracë e dobët që nuk arrin dot të justifikojë pjesën e dytë të fjalisë dhe mbi të gjitha të mbrojë një njeri që është vërtet racist.

 

Pandeli Majko, ministri që do të ketë “në ngarkim” fatet e shqiptarëve në emigracion, lindi më 15 nëntor 1967 në Tiranë. Ka mbaruar studimet e larta në Fakultetin e Inxhinierisë Mekanike në Universitetin e Tiranës në vitet 1986-1992. Ka kryer studimet e larta në Fakultetin e Drejtësisë në Universitetin e Tiranës, në vitet 1994-2000.
Karriera e pasur politike e Pandeli Majkos nisi si Kryetar FRESSH në vitet 1992-1995. Ka mbajtur dy herë postin e Sekretarit të Përgjithshëm dhe Kryetarit të Grupit Parlamentar të Partisë Socialiste të Shqipërisë.
Ka qenë dy herë ministër i Mbrojtjes në qeveritë socialiste. Si ministër Mbrojtjeje, e kujtojnë në Itali për një ide të tij paksa të çuditshme: në vitin 2002, në një takim me homologun italian, Martino, propozoi ndërtimin e një tyneli nënujor në Adriatik për të lidhur Shqipërinë me Italinë.
Karriera e tij politike arriti ulmin në vitet 1998-1999 kur në moshën 31-vjeçare u bë Kryeministër i Shqipërisë.
Postin e Kryeministrit e ka mbajtur për 8 muaj edhe në vitin 2002.
Ka qenë anëtar i Komisionit Parlamentar për hartimin e Kushtetutës shqiptare në Kuvendin e Shqipërisë në vitet 1997 – 1998. Ai deri tani ka qenë kryetar i Delegacionit shqiptar në Asamblenë Parlamentare të NATO-s.
Se ç’do të bëjë për shqiptarët jashtë Shqipërisë, akoma është herët të thuhet me saktësi, pa pasur njohuri akoma as mbi programin e as mbi objektivat e ministrit. Në pritje, i urojmë punë të mbarë.

 

 

Kryeministri Edi Rama deklaron emrat e qeverisë së re: 11 ministri dhe 2 ministra shteti. Shumica kanë qenë pjesë edhe e qeverisë së shkuar, 7 gra

Tiranë, 27 gusht 2017 – Kryeministri Edi Rama deklaroi sot, në punimet e Asamblesë Kombëtare të Partisë Socialiste, emrat e atyre që do të përbëjnë qeverinë e tij të re, që do të jetë më e vogël se pararendësja, me 11 ministri dhe 2 ministra shteti. Bashkë me zëvendëskryeministren, janë shtatë gratë e qeverisë.

Për të parën herë, siç paralajmëroi pak ditë më parë, do të ketë një ministër shteti për diasporën, detyrë për të cilën do të kthehet në qeveri Pandeli Majko.

Qeveria 'Rama 2' – që, në të vërtetë, ka shumë emra nga qeveria e vjetër e pak emra të rinj – do të përbëhet nga:

Kryeministër – Edi Rama
Zëvendëskryeministër – Senida Mesi
Ministër Shteti për Diasporën – Pandeli Majko
Ministre e Shtetit për Sipërmarrësit – Sonila Qato
Ministër i Jashtëm – Ditmir Bushati
Ministër i Brendshëm – Fatmir Xhafaj
Ministre e Mbrojtjes -Olta Xhaçka
Ministër i Drejtësisë – Etilda Gjonaj
Ministria e Financave, Ekonomisë dhe Punës – Arben Ahmetaj
Ministria e Shëndetësisë dhe Kujdesit Social – Ogerta Manastirliu
Ministria e Energjisë dhe e Infrastrukturës – Damian Gjiknuri
Ministria e Bujqësisë dhe Zhvillimit Rural – Niko Peleshi
Ministër i Turizmit dhe Mjedisit – Blendi Klosi
Ministër i Kulturës – Mirela Kumbaro
Ministër i Arsimit, Sportit dhe Rinisë – Lindita Nikolla

“Kjo është qeveria me të cilën do të nisim mandatin e ri. Nëse do të përfundojmë mandatin me këtë qeveri do të varet nga puna e çdo ministri, nga ritmi i punës në mandatin e ri. Ministrat do të kenë gjithë mbështetjen time, por do të kenë një besim të kushtëzuar nga performanca”, deklaroi Rama. Ai bëri të ditur se ekipi i ri qeveritar do të nisë që nesër punën konkrete për finalizimin e programit të qeverisë.

Kryeministri Rama deklaroi gjithashtu se kryetar i Kuvendit do të jetë Gramoz Ruçi, ndërsa kryetar i grupit parlamentar të PS-së, Taulant Balla.