Histori - Shqiptari i Italisë

Presidenti Nishani ka dekretuar ndryshimet në qeveri sipas propozimeve të opozitës. Sot pasdite, seancë e jashtëzakonshme e Kuvendit për miratimin e ministrave teknikë, vetingun dhe KQZ.

Tiranë, 22 maj 2017 – Partia Demokratike publikoi mbrëmë propozimet për zv.kryeministrin dhe ministrat teknikë në qeveri. Po dje, kryeministri Rama dhe kreu i PD-së, Basha, u takuan në mjediset e Pallatit të Kongreseve dhe përmbyllën një nga pikat e marrëveshjes që ata arritën të enjten, 18 maj, atë që ka të bëjë me emrat e posteve që i janë besuar PD-së.

Ja kush janë të propozuarit e opozitës, tashmë të dekretuar edhe nga presidenti Nishani që paraditen e sotme ka shpallur dekretet për lirimin nga detyra të pararendësve dhe emërimin e këtyre të rinjve, emrat e të cilëve i janë dërguar mbrëmë nga kryeministri Rama.

Për postin e zëvendëskryeministrit e emëruara është Ledina Mandia, ish-Avokate e Shtetit. Me profesion juriste, ajo ka qenë edhe një ndër propozimet për Këshillin Drejtues të RTSH.

Për postin e ministrit të Brendshëm, Dritan Demiraj, gjeneral, ish-komandant i Trupave Speciale dhe ish-pjesëtar i Forcave të Armatosura në misionet jashtë vendit. Ka disa diploma universitare e 24 medalje në ushtri dhe në sport (mbresëlënëse CV-ja e tij e ofruar mediave). Trajnues i misioneve paqëruajtëse “Eagle”, si dhe është nderuar me dekoratën “Nderi i Kombit”.

Ministre e Financave, Helga Vukaj, drejtoreshë në KLSH dhe ish zv/drejtoreshë e Agjencisë së Kthimit dhe Kompensimit të Pronave. Ajo është diplomuar në Jurisprudencë (2000), është Doktore e Shkencave Juridike, ka 10 vite eksperience pune si Juriste në Presidencë, Drejtor Drejtorie në Ministri të Brendeshme, zv drejtor i Përgjithshëm në Agjensinë e Kthimit dhe Kompesimit te pronave, 2 vitet e fundit në KLSH si Drejtoreshë e Përgjithshme. Fusha e ekspertizës: Juris-Prudenca (pronat e paluajtshme).

Ministër i Drejtësisë, Gazmend Bardhi. Gëzon reputacion në radhët e PD-së dhe deri më sot ka ruajtur profilin e tij teknik duke punuar si këshilltar ligjor i grupit parlamentar. Ai ka qenë ekspert pranë Komisionit të Posaçëm Parlamentar për Reformën në Drejtësi, ndërsa më herët ka punuar në Drejtorinë e Përgjithshme të Kodifikimit.

Ministër i Arsimit dhe Sportit, Mirela Karabina. Aktualisht pedagoge në Fakultetin e Shkencave të Sociale. Në CV-në e saj, radhit një eksperiencë të gjatë në mësimdhënie. Mirela Karabina është edhe bashkëshortja e ambasadorit në karrierë dhe ish-zv.ministrit të Mbrojtjes, Petrit Karabina. Së fundi, ishte një nga pjesëmarrëset aktive në protestat e çadrës.

Ministër i Shëndetësisë, Arben Beqiri, mjek. Ai është me profesion Kirurg, Gastrohepatolog. Ka mbajtur postin e zv/rektorit të Universitetit të Shëndetësisë dhe për më shumë se 20 vjet ka qenë pedadog i kirurgjisë në Fakultetin e Mjekësisë. Është i njohur për përdorimin e teknikave të reja kirurgjikale kryesisht në fushën endoskopike dhe laparaskopike. I vetmi kirurg shqiptar që u shpall fitues i bursës Fulbright në National Naval Medical Center ëashington DC dhe i vetmi mjek shqiptar anëtar i American Society of Gastrointestinal Endoscopy, i njohur në literaturën ndërkombëtare për kontributin në kërkim shkencor të teknikës së përdorur prej tij në vitin 1997 për endoskopi gastrointestinale.

Ministre e Mirëqenies Sociale dhe Rinisë: Xhuljeta Kërtusha. Ka mbajtur detyrën e kreut të njësisë së blerjes së energjisë dhe zhvillimit të tregut rajonal në CEZ.

Po ashtu, Partia Demokratike ka propozuar Klement Zgurin për postin e Kryetarit të Komisionit Qendror të Zgjedhjeve, prej shumë vitesh anëtar i këtij institucioni, ndërsa avokaten Erinda Ballancën për kreun e Avokatit të Popullit.

Sot pasdite do të mblidhet edhe Kuvendi i Shqipërisë për të miratuar shkarkimin e zëvendëkryeministrit dhe të 6 ministrave dhe zëvendësimin e tyre me teknicienët e propozuar nga Partia Demokratike.

Gjatë seancës së sotme, Kuvendi do të miratojë edhe anëtarët e opozitës në komisionet e vettingut, paketës ligjore per reformën zgjedhore si dhe emërimin e kryetarit të KQZ-së dhe një anëtari të tij, edhe ky i fundit i propozuar edhe nga opozita.

Pikat e rendit të ditës të Kuvendit janë:

1. Votimi i Dekreteve të Presidentit për lirim dhe emërim të:
– Zëvendëskryeministrit
– ministrit të Punëve të Brendshme
– ministrit të Arsimit dhe Sportit
– ministrit të Shëndetësisë
– ministrit të Mirëqenies Sociale dhe Rinisë
– ministrit të Financave
– ministrit të Drejtësisë
2. Projektvendim “Për një ndryshim të vendimit nr. 12/2017 “Për zgjatjen e afatit të veprimtarisë së Komisionit të Posaçëm të Reformës Zgjedhore”
3. Shqyrtimi dhe miratimi i paketës ligjore propozuar nga Komisioni i Posaçëm i Reformës Zgjedhore;
4. Projektvendim “Për caktimin e përfaqësuesve të pakicës parlamentare në komisionet
Për verifikimin e kandidatëve në institucionet e rivlerësimit, sipas vendimit nr. 41/2017 të Kuvendit të Shqipërisë me 6 anëtarë
Për përzgjedhjen e kandidatëve në institucionet e rivlerësimit, sipas vendimit nr. 45/2017 të Kuvendit të Shqipërisë me 12 anëtarë”
Për përzgjedhjen e kandidatëve në institucionet e rivlerësimit, sipas vendimit nr. 46/2017 të Kuvendit të Shqipërisë me 6 anëtarë”
Për caktimin e dy anëtarëve zëvendësues të opozitës në Komisionin Ad Hoc për verifikimin e kandidatëve për Institucionet e Rivlerësimit
5. Projektvendime “Për lirimin nga detyra të një anëtari të KQZ-së” dhe “Për emërimin e një anëtari të KQZ-së”
6. Projektvendime “Për lirimin nga detyra të Kryetarit të KQZ-së” dhe “Për emërimin e Kryetarit të KQZ-së”

 

 

 

Grasso: “Integrimi i të huajve na bën më të fortë”

Pietro Grasso, kryetari i Senatit, në manifestimin “20 Maj pa mure” në Milano ku morën pjesë rreth 100 mijë persona, i kushtoi dy fjalë edhe ligjit mbi shtetësinë: “Nevojiten ligje të drejta, duke filluar nga rregullat mbi shtetësinë: sepse kush lind në Itali, kush studion bashkë me bijtë tanë, nipërit tanë, kush angazohet për të mirën e të gjithëve, është italian. Jemi këtu për të mbrojtur shpirtin e thelbin e Kushtetutës italiane, që njeh të drejtat themelore në mënyrë universale dhe shkon deri atje sa parashikon që i huaji të cilit i mohohet ne vendin e vet ushtrimi efektiv i lirive demokratike të garantuara nga Kushtetuta, ka të drejtën të mirëpritet në territorin e Republikës italiane. Integrimi i të huajve që kanë të drejtën të jetojnë në Vendin tonë, nuk është dhuratë, nuk është manifestim zemërgjerësie, por vlen për të bërë Vendin tonë edhe më të fortë”.

Reforma e shtetësisë për brezat e dytë që do të sillte në fuqi pak a shumë këtë që thotë Grasso ndodhet tashmë në Komisionin për Çështjet Kushtetuese e më 15 qershor do të diskutohet në seancë plenare të Senatit.

 

 

 

Detajet e marrëveshjes së arritur mes Kryeministrit e liderit të PD-së

Tiranë, 18 maj 2017 – Janë zbardhur më në fund edhe detajet e marrëveshjes mes kryeministrit Edi Rama dhe kreut të opozitës, Lulzim Basha.

Ja deklarata e plotë e bërë nga PD e PS me pikat konkrete të marrëveshjes së konkretizuar:

Palët në këtë marrëveshje shprehin mirënjohjen dhe falenderimin për Shtetet e Bashkuara të Amerikës dhe Bashkimin Europian për kontributin e tyre në forcimin e demokracisë dhe shtetit të së drejtës në Shqipëri si dhe në mënyrë të veçantë, për zgjidhjen e situatës politike për zgjedhjet e vitit 2017.

Palët konfirmojnë vullnetin e tyre për dialog të drejtpërdrejtë si shprehje e domosdoshmërisë për një nivel të ri të dialogut politik në vend. Në këtë kuadër, palët angazhohen për institucionalizimin e dialogut mes kryetarit të mazhorancës dhe kryetarit të opozitës.

Angazhimi i palëve për zgjedhje me standarte demokratike do të jetë pjesë thelbësore e kontributit të përbashkët dhe të vazhdueshëm të palëve në kuadër të çeljes së negociatave dhe perparimit të vendit në procesin e integrimit europian të Shqipërisë.

ZGJEDHJET

Presidenti i Republikës dekreton datën e re të zgjedhjeve më 25 qershor 2017.
Regjistrimi i menjëhershem i partive politike të opozitës. Regjistrimi i listave shumemërore të partive politike të opozitës brenda datës 26 Maj 2017.
Listat e zgjedhësve
Përfshirja në listat e zgjedhësve e zgjedhësve të rinj që votojnë në datën e re të zgjedhjeve.
Dhënia e aksesit opozitës në informacionin e mbledhur nga projekti i Adresave dhe çështjet të tjera të lidhura me zgjedhësit, nëpërmjet auditeve të KQZ-së.
Mbështetje KQZ-së për përgatitjen e materialeve zgjedhore.
Plotësimi i komisioneve zgjedhore dhe grupeve të numërimit.
Zgjedhjet e pjesëshme për bashkinë e Kavajës, do të zhvillohen në të njëjtën ditë me zgjedhjet e përgjithëshme.
Pezullimi i çdo iniciative për kontrata të përkohëshme në nivel qëndror dhe vendor.
Mbështetje ndërkombëtare për forcimin e monitorimit te listës së zgjedhësve.
Mbështetje ndërkombëtare për KQZ- për ngritjen e linjave telefonike të ndihmës për vezhgimin dhe shqyrtimin e ankesave mbi ligjin e shërbimit civil dhe blerjen e votës.

QEVERIA

zv/Kryeministër, teknik
Ministri i Brendshëm, teknik
Ministri i Arsimit, teknik
Ministri i Shëndetësisë, teknik
Ministri i Mirëqenies Sociale dhe Rinisë, teknik
Ministri i Financave, teknik
Ministri i Drejtësisë, teknik
Drejtori i OSHEE
Drejtori i Përgjithshëm i Aluiznit
Drejtori i Përgjithshëm i Hipotekave
Drejtori i pergjithshem i Burgjeve
Drejtori i pergjithshem i Agjensisë së Zhvillimit Bujqësor e Rural

Kandidaturat e mësipërme do të jenë propozim i opozitës.

PARLAMENTI

Votimi i organeve të Vetting-ut.
Votimi i dekreteve për anëtarët e rinj të Këshillit të Ministrave.
Ndryshim i Kodit Penal për forcimin e politikës penale nëpermjet ashpërsimit të sanksioneve, krijimit të veprave të reja penale, kthimin e shitblerjes së votës në vepër korrupsioni.
Forcimi i kuadrit ligjor të financimit të partive politike nëpërmjet rregullimit dhe kufizimit të shpenzimeve zgjedhore, përfshirë ato materiale, kostove dhe transparencës në lidhje me to.
Përmirësimi i standarteve të pasqyrimit të fushatës elektorale në media.
Votimi i anëtareve të Këshillit të Ministrave, anëtareve të organeve të vettingut dhe i legjislacionit të parashikuar në këtë marrëveshje, do të kryhet në të njëjtën seancë të jashtëzakonshme të parlamentit.

ORGANET E PAVARURA

Kryetari i KQZ, propozim i opozitës.
Avokati i Popullit, propozim i opozitës.

REFORMAT

Reforma Kushtetuese (me fillimin e legjislaturës së re).
Reforma zgjedhore (me fillimin e legjislaturës së re).
Futja e teknologjive elektronike në procesin e identifikimit votimit dhe numërimit për zgjedhjet pasuese.
Reformim tërësor i sistemit të prokurimeve publike dhe auditimit të shpenzimeve publike.

MASA TE TJERA

Largimi dhe parandalimi i personave me rekorde kriminale nga mbajtja e posteve publike.
Partitë politike angazhohen publikisht për ekzaminimin e fortë mbi listat partiake.
KQZ ekzaminon kandidatët nëpërmjet personelit shtesë me mbështetje ndërkombëtare (të plotësuar në përputhje me ligjin nr 138/2015 për garantimin e integritetit të funksionarëve publik ).
Administrata Publike. Marrja e masave për ndalimin e përdorimit në favor të subjekteve zgjedhore të mjeteve, pronave dhe të burimeve njerëzore të administratës publike si dhe kundër çdo forme presioni ndaj punonjësve të administratës publike në çdo nivel.
Narkotikët. Forcimi i luftës kundër narkotikëve, nëpërmjet pjes
ëmarrjes së opozitës në Task forcën Kombëtare të luftës kundër narkotikeve.

 

 

 

 

 

Pas tre muajve çadër në bulevard nga anë e PD-së e shumë e shumë negociatave me ndërmjetësimin e të huajve, më në fund natën duke gdhirë dita e sotme, pas një takimi disaorësh kokë më kokë është arritur një marrëveshje mes kryeministrit Rama dhe kreut të partisë më të madhe opozitare.
Kryeministri Edi Rama dhe kreu i opozitës kanë dalë së bashku nga Kryesia e Kuvendit rreth orës 1:20 të natës. I pari që ka folur shkurt për mediat ishte Basha. Ai tha se është arritur një marrëveshje sipas paketës McAllister +. Brenda ditës së sotme do të jepen edhe detajet e kësaj marrëveshjeje.
I pyetur për datën e zgjedhjeve, Basha ka hezituar të flasë, duke i dhënë fjalën Ramës, i cili është shprehur shkurt: “Jam 100% dakord me kryetarin e opozitës për këtë pjesë”.
Rama është largur pasi i ka shtrënguar dorën Bashës. Ky i fundit është pritur me oavacione nga simpatizantët e PD-së në çadër ku shkoi menjëherë më pas për një komunikim të shkurtër me simpatizantët që ndodheshin aty.
Basha tha se është rënë dakord të mos thotë asgjë derisa të konkretizohet marrëveshja, që sipas tij garanton zgjedhje të lira e të ndershme.
“Gjithçka ka ndryshuar dhe e pamenduara tre muaj më parë, është arritur. Marrëveshja i hap rrugën zgjedhjeve të lira e të ndershme.  Sot nisim përgatitjet për t’i dhënë shqiptarëve zgjedhje të lira. Ju falenderoj për qëndresën tuaj”, iu drejtua kreu i PD-së mbështetësve të tij por theksoi se “Çadra nuk do të mbyllet. Në fillim të detajojmë marrëveshjen dhe pastaj të japim lajmin e mirë”.

Piacenza. Prokuroria e të miturve ngre padi ndaj të riut shqiptar

Romë, 17 maj 2017 - Çështja e të miturve shqiptarë të pashoqëruar në Itali vazhdon të mbetet e hapur për sa kohë numri i tyre vazhdon të rritet (ka shkuar në 1.672 vetë në fund të marsit 2017, ishte 1.611 në fund të vitit të shkuar), madje ka edhe raste paditjesh të të miturve për mashtrim ndaj shtetit.

Është i sotmi një lajm nga Piacenza ku një 15vjeçar shqiptar është paditur nga Prokuroria për të miturit e Bolonjës, me akuzën mashtrim ndaj shtetit. Me pak fjalë, sipas hetuesve, ai nuk ka pasur ndonjë problem të veçantë – ishte i veshur mirë, i pastër e me ca para në xhep – por është vetëdeklaruar i braktisur për të përfituar nga ligji italian mbi të miturit e huaj të pashoqëruar.

Vjeshtën e shkuar komuna e Piacenzas ngriti zërin për këtë dukuri në rritje që vërente në qytet: shtimin e numrit të të miturve shqiptatë të pashoqëruar që duheshin marrë në ngarkim nga autoritetet vendase. Madje gjithnjë vjeshtën e shkuar, përgjegjësi i drejtorisë së Welfare-t të komunës, Stefano Cugini, protestoi edhe në konsullatën e përgjithshme të Shqipërisë në Milano, gjë që përfundoi edhe në emisionin televiziv “Le Iene” e që – sipas www.ilpiacenza.it - “nuk i pëlqeu aspak konsullatës së Tiranës e cila paralajmëroi komunën piaçentine të mos bënte më një gjë të tillë”. Asokohe, Komuna e Piacenzas, mendonte se mund të kishte ndonjë organizatë kriminale pas atyre ardhjeve të shumta të të rinjve shqiptarë, thuajse të gjithë nga e njëjta zonë, ndaj kuestura nisi edhe hetimet. E me paditjen e fundit të 15-vjeçarit për mashtrim ndaj shtetit, duket se nuk është zbuluar ndonjë bandë që përfiton nga ardhja në Itali e këtyre të miturve.

Lexo edhe:
Të miturit shqiptarë “të braktisur” në Itali. A shqetëson Shqipërinë kjo çështje?
Si të pajisesh shpejt me një lejeqëndrim në Itali. Mënyra e shqiptarëve
“Braktisja” e të miturve në Itali, paditen 66 shqiptarë
Të miturit e braktisur
“Eksodi" i të miturve

 

Giugliano. Është shqiptari Eugen Kami, personi që mëngjesin e djeshëm është qëlluar me armë nga i zoti i shtëpisë ku kish hyrë. Tani ndodhet në spital duke luftuar mes jetës dhe vdekjes

Romë, 17 maj 2017 – Një polic ka pikasur hajdutë në shtëpi në të gdhirë të ditës së djeshme dhe ka qëlluar me armë zjarri një prej tyre. Ngjarja ka ndodhur në Giugliano të Napolit dhe është Eugen Kami, 36 vjeç, personi që ka mbetur i plagosur rëndë e tani është i shtruar në spitalin Cardarelli.

Sipas rindërtimit të ngjarjes nga vetë polici, agjent në kuesturën e Napolit, ky është zgjuar nga të lehurat e qenit në 4.30 dhe ka dalë në ballkon të katit të dytë të vilës ku jeton, në kat të parë të të cilës jeton një tjetër familje. Kur ka parë tre të panjohur në oborr u ka thirrur: “Ndal, policia!”, por si përgjigje një prej tyre ka shtënë me pistoletë, plumbi i të cilës ka përfunduar në mur. Polici i është përgjigjur me armë dhe ka goditur një prej banditëve që ka mbetur në vend ndërsa dy të tjerët ia kanë mbathur.

Personi i goditur është çuar me urgjencë në spital, fillimisht në atë të Pozzuoli-t e më pas në Crdarelli të Napolit ku është në gjendje shumë të rëndë shëndetësore për shkak se ka humbur një sasi të madhe gjaku. Pasditen e të martës policia njoftoi se i plagosuri është Eugen Kami, 36 vjeç, emigrant shqiptar i parregullt në Itali. Kami ka precedentë penalë për vjedhje e bashkë me dy miqtë e tij që arritën të largoheshin mendohet se kanë kryer edhe vjedhje të tjera në zonë. Pistoleta me të cilën qëlloi, është armë e vjedhur në Giugliano në vitin 2015.

Policia e Napolit po punon për identifikimin e kapjen e dy personave të tjerë.

Për Kuestorin e Napolit, De Iesu, agjenti “ka vepruar me profesionalitet dhe për vetëmbrojtje”. “E megjithatë, - ka pranuar De Iesu – fjala e fundit i takon  prokurorisë së Napolit që po ndjek hetimet për zbardhjen e ngjarjes dhe gjykatës”.

 

 

 

Me pak fjalët që lejon të shprehurit në rrjetin social Twitter, eurodeputeti Eduard Kukan i shpreh mbështetje të plotë komisionerit evropian të Zgjerimit Johannes Hahn për letrën drejtuar shqiptarëve me të cilën shprehte keqardhje për mosgjetjen e dialogut e moshyrjen në zgjedhje të PD-së, si edhe mospajtimin dhe dënimin e hapur për këdo që mundohet të pengojë proceset demokratike në Shqipëri.
“Përkrahje të plotë komisionerit Johannes Hahn dhe letrës së tij drejtuar shqiptarëve” shkruan ai mbrëmjen vonë të të enjtes.

Lexo edhe
Komisioneri Hahn: “Shqiptarët meritojnë proces zgjedhor demokratik”
Shqiptarëve u shkruan një europian i lodhur me marrëzinë e tyre

 

Në një letër të hapur drejtuar shqiptarëve, thekson se zgjedhjet do të bëhen edhe pa opozitën. “Nuk mund të bojkotohet demokracia. Edhe moszhvillimi i zgjedhjet në Kavajë është humbje për demokracinë”

Tiranë, 11 maj 2017 – “Gjatë disa javëve të fundit, janë bërë disa përpjekje për të nxitur dialogun midis partive politike në Shqipëri. Nga përfaqësues të BE-së, përfshirë veten dhe partnerët e tjerë ndërkombëtarë. Ne kemi dëgjuar me kujdes shqetësimet dhe pritjet nga të gjitha anët, duke u përpjekur për të lehtësuar një zgjidhje të krizës në vazhdim. U ofruan një numër opsionesh, me shpresë që partitë dhe udhëheqësit të jetojnë në përgjegjësinë e tyre për të gjetur një zgjidhje të përbashkët. Për fat të keq, ky nuk ndodhi”. Kështu u drejtohet sot shqiptarëve “me shqetësim të madh” Komisioneri për Zgjerimin në Bashkimin Europian, Johannes Hahn me një letër të hapur.

Në vijim ai shton se opozita u tërhoq nga procesi zgjedhor. “Zgjedhjet do të zhvillohen më 18 qershor pa pjesëmarrjen e partive kryesore të opozitës. Ishte zgjedhja e qëllimshme e opozitës aktuale për të mos kandiduar për zgjedhje. Unë duhet ta respektoj, por në të njëjtën kohë shpreh keqardhje të thellë për këtë vendim nga pikëpamja demokratike. Shqiptarët kërkojnë dhe meritojnë zgjedhje që ofrojnë një ofertë të gjerë politike dhe standarde zgjedhore. Megjithatë, procesi demokratik duhet të vazhdojë, edhe nëse disa vendosin të qëndrojnë prapa. Demokracia dhe standardet demokratike nuk do të pengohen duke bojkotuar institucionet dhe zgjedhjet demokratike. Zgjedhjet do të vlerësohen sipas meritave të tyre, bazuar në standardet ndërkombëtare”, lexohet në letrën e Komisionerit.

Hahn kërkon nga institucionet shqiptare të angazhohen për procesin zgjedhor, dhe shton se autoriteti më kompetent evropian për vëzhgimin e zgjedhjeve, ODIHR, kohët e fundit ka nisur aktivitetin e vëzhgimit të zgjedhjeve në Shqipëri. Madje shton: “Është në interes të Shqipërisë dhe institucioneve të saj që OSBE/ODIHR dhe vëzhguesit e tjerë ndërkombëtarë të mund të kryejnë më së miri rolin e tyre vendimtar dhe vlerësimin e zgjedhjeve”.

Hahn thekson: “Më lejoni të jem i qartë për një gjë. I dënoj fort thirrjet për “veprime” që do të cenonin të drejtën e votës dhe liritë themelore të qytetarëve. “Veprime” të tilla s’mund të justifikohen dhe nuk puqen me standardet e BE-së”.

“Në të kundërt është një e drejtë themelore evropiane që idetë dhe propozimet politike, pavarësisht se u pëlqen apo jo, të diskutohen në brendësi të institucioneve demokratike, veçanërisht në parlamentin shqiptar. – vazhdon Hahn – Kjo është theksuar fort në të gjitha takimet me lederë politikë shqiptarë të të gjitha palëvë. Në këtë aspekt më lejoni të them një gjë: moszhvillimi i zgjedhjet në Kavajë nuk është fitore e askujt përkundrazi është një humbje e qartë për demokracinë”.

Më tej, Hahn shpreh besimin se populli shqiptar do të kërkojë nga udhëheqësit e tyre politikë të demonstrojnë vetëpërmbajtjen dhe maturinë demokratike që pritet në një vend që aspiron të jetë anëtar i BE.

“Le të jemi të qartë: liderët do të mbajnë përgjegjësi nëse ata përpiqen të bllokojnë aspiratat legjitime të popullit shqiptar për një të ardhme më të mirë. BE do të ndjekë dhe do të monitorojë nga afër procesin elektoral. Dhe ajo që është më e rëndësishme është që do vazhdojmë të ju mbështesim ju në rrugën drejtë anëtarësimit në BE”, përfundon Komisioneri Hahn.

Letra e plotë në origjinal: Statement of Commissioner Hahn to the citizens of Albania

 

Në vitin 1992 hyn me socialistët në të parin Parlament pluralist pas rënies së regjimit dhe që atëherë ka qenë deputet për të gjithë 25 vjetët e mëpasshëm. Së fundi, në pak vjet, Meta ia arrin të imponojë veten në skenën politike të vendit, duke e kthyer LSI-në në partinë e tretë të Shqipërisë, falë edhe lëvizjeve të tij të guximshme, majtas e djathtas
Nga Lavdrim Lita, East Journal

Ilir Meta, 48 anni, kryetari aktual i Kuvendit të Shqipërisë u zgjodh më 28 prill presidenti i ri i Republikës së Shqipërisë me 87 vota në favor e vetëm 2 kundër, ndërsa opozita e qendrës së djathtë e udhëhequr nga Lulzim Basha ka bojkotuar votimin. Meta do të betohet më 24 korrik, kur përfundon mandati i presidentit në ikje, Bujar Nishani.

Në fjalimin e tij menjëherë pas zgjedhjes, Meta pohoi se e pranoi rolin e kreut të shtetit i shtyrë nga bojkotimi parlamentar i opozitës, që nuk mori pjesë në votim. Ai u bëri thirrje partive politike që të gjejnë konsensus, “që Shqipëria të mos bëhet si Maqedonia”. Meta premtoi të zgjedhë demokracinë përpara pushtetit “siç kam bërë gjithmonë”, dhe pohoi dëshirën për bashkëpunim me presidentin në ikje Nishani, kryeministrin Rama dhe opozitën për të siguruar zgjedhje të lira dhe demokratike.

Zgjedhja e Metës në krye të shtetit, në prag të fushatës për zgjedhjet 18 qershorit që Partia Demokratike e Lulzim Bashës kërcënon të bojkotojë, mund të përforcojë koalicionin mes LSI-së, tashmë të drejtuar nga ministri i Drejtësisë Petrit Vasili, dhe Partisë Socialiste të Edi Ramës.   

Kush është Ilir Meta

Ilir Meta është një nga politikanët me përvojën më të gjatë në jetën politike shqiptare. I biri i një komisari partie në Akademinë ushtarake të Tiranës, Ilir Meta hyn në politikë me ndihmën e profesorëve të tij të ekonomisë kapitaliste dhe socialiste.

Anëtar i lëvizjes studentore, në moshën 23-vjeçare Meta hyn me socialistët në të parin Parlament pluralist pas rënies së regjimit. Ishte viti 1992 e që atëherë ka qenë deputet për të gjithë 25 vjetët e mëpasshëm. Ka qenë i pari politikan i vendit i zhveshur nga imuniteti parlamentar: iu hoq pas një revolte në Poliçan, në krahinën e tij të lindjes, në të cilën Meta kishte pasur rolin e ndërmjetësuesit për të garantuar lëshimin e dy komisarëve të marrë peng. Berisha e akuzoi se ishte ai organizuesi i revoltës dhe i hoqi imunitetin për të mundësuar arrestimin, por prokuroria nuk çoi përpara çështjen dhe socialistët e zgjodhën nënsekretar të partisë. Nga ai çast, karriera e tij politike mori krahë. 

Është një nga themeluesit e Forumit Eurosocialist të të rinjve (FRESSH), zëvendës kryeministër në qeverinë e Pandeli Majkos në vitin 1998. Në moshën 30 vjeç, ngjit shkallët e pushtetit në gjirin e partisë socialiste dhe në qeveri, e nga viti 1999 deri në 2002-shin bëhet kryeministër i vendit, më pas ministër i jashtëm e ndeshet ashpër me kryeministrin e ri socialist Fatos Nano. Si kryeministër Meta lidh aleancë gjithnjë e më të fortë me kryebashkiakun e ri të Tiranës, Edi Ramën, gjithnjë në funksion të një lufte të brendshme me liderin e partisë Fatos Nanon. Në dhjetë vitet që do të pasojnë, marrëdhënia e tij me Edi Ramën do të karakterizohet më shumë nga urrejtja se nga dashuria.

Meta njihet si kokëfortë. Pas disa përleshjesh në Tropojë, vendlindja e Sali Berishës, pa iu dridhur qerpiku, në nëntor 2000 Ilir Meta urdhëroi ndalimin dhe marrjen në pyetje të liderit të kreut të opozitës, Berishës.

Në vitin 2004, bashkë me një grup eksponentësh të PS-së, pas një zënieje më kryeministrin e asokohe, Nanon, braktis socialistët dhe themelon një forcë të re politike, Lëvizjen Socialiste për Integrim (LSI), që drejton deri ditët e sotme. Partia e re merr 5 deputetë (ndër 140 të Kuvendit) në vitin 2005 e 4 në vitin 2009, duke fituar kështu një rol kyç për zgjidhjen e ngërçit mes socialistëve dhe demokratëve.

Brenda pak vjetëve, Meta ia del të imponojë veten në skenën politike të vendit, duke e kthyer LSI-në në partinë e tretë të Shqipërisë, falë edhe lëvizjeve të guximshme, si ajo në vitin 2009, kur lidh aleancë me qendrën e djathtë, duke i ofruar ish kryeministrit Sali Berisha mundësinë për një mandat të dytë qeverisës. Pas pesë vjetësh në opozitë në krah të socialistëve, në fakt, në 2009 Meta ndërron kah politik. Berisha ia shpërblen duke i dhënë Metës postin e zëvendës kryeministrit, të ministrit të Jashtëm, dhe më pas të ministrit të Ekonomisë, tregtisë dhe Energjetikës. Por pas një viti, Meta detyrohet të japë dorëheqjen pas publikimit të një videoje që e tregon teksa diskuton për një ryshfet prej 700,000 € për ndërtimin e një hidrocentrali, duke deklaruar se  kishte ndikuar deri edhe Gjykatën e Lartë. Një vit më vonë, e njëjta Gjykatë e Lartë i njeh pafajësinë për shkak të mungesës së provave.

Në zgjedhjet politike të vitit 2013, Meta ndahet nga Berisha për t’u lidhur me socialistët e Ramës. LSI fiton 16 vende në Kuvend e Ilir Meta zgjidhet Kryetar i Kuvendit të Shqipërisë.

Artikulli në origjinal në East Journal:
ALBANIA: Ilir Meta eletto presidente. Un vita passata al potere