“Qengji në kore lajthish” i shefit Fundim Gjepali - Shqiptari i Italisë

Lifestyle
Më 14 mars shefi Fundim Gjepali u shpall fitues i ‘Gran Prix Intercazionale’ të kuzhinës mesdhetare të organizuar në Gragnano të Campania-s. Pjata me të cilën meritoi këtë çmim është “Qengj në kore lajthish” dhe Fundimi ka mirësinë të japë recetën për lexuesit e Shqiptariiitalise.com. “Është pjatë e thjeshtë dhe kushdo që ka dëshirë të gatuajë e bën pa shumë probleme. Përbërësit e kësaj recete gjenden lehtë, edhe në Shqipëri, dhe gatimi nuk është i vështirë” shpjegon shefi Fundim, që shton duke qeshur “Këtë e shumë receta të tjera të krijuara e të përgatitura nga unë e stafi im, mund t’i shijoni në restorantin Arco Antico në Romë”.
Qengji në kore lajthish

Përbërësit për katër persona:

2 fileta qengji për t’u pastruar nga 600 gr secila;
miell 00 – 50 gr;
2 vezë;
kripë;
vaj ulliri ekstra i virgjër.

Për koren nevojiten:

bukë e thërrmuar – 100 gr;
erëza si rosmarinë, sherbelë, trumzë – 2-3 degë;
lajthi të shtypura imët (të kthyera në miell) - 30 gr;
lajthi të shtypura – 100 gr;

Për salcën e shpejtë:

kockat e qengjit;
selino;
karotë;
qepë;
1 thelp hudhër;
1 gotë verë të bardhë;
vaj ekstra i virgjër;
kripë.

Përgatitja:

Pastroni filetat e qengjit, i kriposni dhe i lyeni me miellin 00. Kalojini në vezë dhe më pas në përzierjen e të gjithë ingredientëve të sipërpërmendur për koren. Mbështillëni mishin me qese dhe lëreni në frigorifër rreth 10 minuta.

Nxirreni nga frigoriferi, hiqini qesen dhe skuqni mishin në vaj të nxehtë 180°. Përfundoni pjekjen në furrë të nxehtë 200° për 6/7 minuta.

Për salcën e shpejtë, futni në furrë të nxehtë 200°, kockat që ju kanë mbetur nga pastrimi i mishit të qengjit, për 10 minuta (është mirë që t’i vini në një enë me brima të mbështetur në një tepsi në mënyrë që yndyra që shkrihet të ndahet nga kockat).

Në një tigan skuqni selinonë, karotën, qepën dhe 1 thelp hudhër të grira. Më pas shtoni edhe kockat të cilave u keni hequr yndyrën që u është tretur në furrë, dhe vazhdoni skuqjen. Në fund hidhini gotën e verës dhe lëreni salcën në zjarr të avashtë deri as salca t mbetet sa 1/3 e sasisë fillestare. Filtrojeni, hidhini kripë dhe mbajeni në vend të ngrohtë deri sa të shtroni në tavolinë.

 Në foto, mishin e gatuar në këtë mënyrë e keni të shoqëruar me patate dhe “puntarelle”, një sallatë tipike e Romës.

Ju bëftë mirë!

Shqiptari i Italisë

Lexo edhe: Fundim Gjepali fitues i Gran Prix ndërkombëtar të Kuzhinës Mesdhetare