Në La Scala, Manon është vetëm Ermonela Jaho - Shqiptari i Italisë

Shqiptarë të Italisë
Më 19 qershor, në Teatrin La Scala të Milanos pritej premiera a Manon e Jules Massenet, me sopranon Anna Netrebko në rolin kryesor. Por në vend të saj do të dalë në skenë artistja shqiptare Ermonela Jaho e cila do të këndojë në të shtatë datat që janë në program

Ditën e martë, më 19 qershor, në Teatrin La Scala të Milanos jepet premiera e Manon e Jules Massenet, me sopranon shqiptare tashmë me famë botërore Ermonela Jaho në rolin kryesor. Parashikohej që premiera të kishte si Manon sopranon ruse Anna Netrebko, por për arsye shëndetësore kjo është tërhequr dhe në vend të saj Jaho do të këndojë në të shtatë datat që janë në program.

Është herë e dytë që ndodh një gjë e tillë: Ermonela Jaho ka korrur suksesin më të madh të deriatëhershëm në shkurt të 2008-tës në rolin e Violetës së operës "La Traviata" të kompozitorit Giuseppe Verdi në Royal Opera House të Londrës duke zëvendësuar pikërisht sopranon e mirënjohur ruse Anna Netrebko të sëmurë papritur nga një bronshit. Dhe pikërisht pas interpretimit të Jahos, një nga spektatorët do të shprehej "Bravo Ermonela. Netrebko, tani mund të kthehesh në shtëpi!".

Vjet më 17 qershor, ishte Ermonela ajo që hapi sezonin e 89-të lirik të Arenës së Veronës si Violeta në operën La Traviata. "Një triumf i vërtetë". Me këto fjalë shtypi italian përshkroi interpretimin e operës. E pjesë e atij suksesi ishte padyshim Ermonela Jaho, sopranoja shqiptare në petkun e Violetës, e cila që me notat  e para mrekulloi publikun dhe kritikën. “Një Ermonelë e fuqishme, në rolin e protagonistes, u tregua soprano me temperament të fortë dhe zë të admirueshëm”, shkruan për të gazetat të nesërmen e premierës. “Të hapja sezonin lirik në 150 vjetorin e Unitetit të Italisë, me presidentin Napolitano të pranishëm, me operën time të preferuar, ishte një çast i mrekullueshëm, emocionues dhe unik, jo vetëm nga ana profesionale por edhe humane. – tregonte atëherë për Shqiptari i Italisë – Madje në fund të spektaklit Presidenti erdhi e na takoi ne artistët. Do të më mbeten të pashlyera në zemër përgëzimet e tij, për zërin dhe italishten time të pastër që sipas tij, edhe pse në një hapësirë gjigante si arena,  kish arritur të kapte emocionin e çdo fjale”.

Shqiptari i Italise