Tema mërgimi - Shqiptari i Italisë

“Punësimi dhe jetesa në Gjermani”, broshura informuese e botuar nga ambasada për të përfituar një leje qëndrimi

Tiranë, 4 mars 2016 - Ambasada gjermane në Tiranë publikoi së fundi një broshurë informuese në gjuhën shqipe  për të gjithë ata që duan të punojnë në Gjermani.

E titulluar “Punësimi dhe jetesa në Gjermani”, broshura është përgatitur nga Agjencia Federale e Punësimit.

“Me efekt ligjor nga data 28.10.2015 janë lehtësuar kriteret ligjore për futjen në tregun gjerman të punës të qytetareve dhe qytetarëve nga Republika e Shqipërisë: Nga data 01.01.2016 e deri më datën 31.12.2020 qytetaret e qytetarët nga Republika e Shqipërisë kanë mundësi të marrin një leje qëndrimi në Gjermani për të gjitha profesionet e punës, shkollimet profesionale, e punë të tjera ndihmëse” lexohet që në fillim të broshurës.

Më pas sqarohen konkretisht kushtet dhe mundësitë që çdo qytetar shqiptar ka për të emigruar dhe për të gjetur një punë në Gjermani. Numërohen mbi 130 profesione pune për punonjës të kualifikuar që shkojnë nga shëndetësia në ndërtim, nga elektriçistët në profesionistë të sektorit të komunikacionit rrugor dhe logjistikës. Theksohet gjithashtu që “kush aplikon për vend pune duhet të zotërojë gjuhën gjermane në nivelin e duhur”.

Shkarko broshurën Punësimi dhe jetesa në Gjermani

 

Që nga fillimi i këtij viti vihet re një shtim i numrit të shqiptarëve që duan të kthehen në vendlindje. Arsyet lidhen me hapjen e tregut të punës. Por ka disa prej tyre që duan të kthehen në atdhe dhe nuk munden.

Foto Deutsche WelleDeri në 100 vetë në ditë largohen ditët e fundit nga aeroporti i Frankfurtit në drejtim të Tiranës apo Prishtinës. Këtë rritje të numrit të azilkërkuesve, shumica e të cilëve udhëton me shpenzimet e veta, e konfirmon edhe zyra e shtypit të Policisë Federale në Aeroportin e Frankfurtit e pyetur nga Deutsche Welle. Shqiptarët që duan të kthehen marrin pasaportat para kthimit në atdhe dhe një letër konfirmimi që personi largohet vullnetarisht nga Gjermania.

Kthim me shpresë rikthimi

Një ndër arsyet e kthimit është frika e bllokimit të hyrjes në zonën Shengen për ata azilkërkues, të cilët kanë marrë letrën e refuzimit dhe që iu kërkohet largimi nga Gjermania. Para dëbimit me një shënim në pasaportë shumë vetë pra preferojnë largimin vullnetar. Por largimi vullnetar nga Gjermania me sa duket bëhet edhe me shpresën e rikthimit legal në këtë vend. Që nga hyrja në fuqi më 1 janar të këtij viti e rregulloreve, që e hapin tregun e punës për njerëzit nga Ballkanit, përfshi këtu edhe qytetarë nga Shqipëria apo Kosova shumë vetë preferojnë kthimin vullnetar. Nga fillimi i këtij viti në ambasadën gjermane në Tiranë për shembull janë regjistruar 170 kërkesa për një vend të rregullt pune në Gjermani.

Por ndërkohë që qindra vetë marrin avionin për në atdhe ka disa shqiptarë që duhet të presin më gjatë për kthimin. Shkak për këtë është bërë një fenomen që së fundmi në mediat gjermane përmendet si "fenomeni i humbjes së pasaportave". Në fakt bëhet fjalë për një "humbje" të përkohshme të pasaportave në varavingon burokratike të autoriteteve gjermane të azilit dhe të huajve. Annegret Spitz e ngarkuar për këshillimin e refugjatëve që duhet të kthehen në organizatën humanitare "Kölner Diakonie" e pyetur nga Deutsche Welle pohon se "ndodh shpesh që refugjatët, të cilët dorëzojnë pasaportën në Zyrën e Emigracionit apo në autoritete të tjera, ku ata regjistrohen duhet të presin shumë gjatë derisa të shfaqen pasaportat në zyrat e të huajve." Vitin e kaluar janë këshilluar rreth 640 persona në "Kölner Diakonie" dhe gati tek një e treta e tyre është përballur me fenomenin e zhdukjes burokratike të pasaportës, thotë Annegret Spitz.

Zhgënjim tek azilkërkuesit që duan të kthehen

E ngarkuara e "Kölner Diakonie" konstaton se këtë fenomen të zhdukjes disamujore të pasaportës e ka vënë re më shpesh tek shqiptarët nga Shqipëria apo Kosova. "Ndoshta kjo lidhet me atë që këta persona i kanë pasur pasaportat me vete krahasuar me nacionalitete të tjera". Në zyrat e organizatës "Kölner Diakonie" Spitz ka këshilluar një shqiptar nga Shqipëria, i cili e kishte dorëzuar pasaportën dhe duhej të priste gjatë për kthimin në Shqipëri. Mbi rastin e shqiptarit me pasaportë "të humbur", Annegret Spitz tregon se ai priti me durim. "Ai vinte herë pas here tek ne, pyeste, ne po ashtu pyesnim tek autoritetet tek Zyra Federale e Emigracionit". Pasaporta e shqiptarit, emrin e të cilit "Kölner Diakonie" për arsye të mbrojtjes së personit nuk e përmend, u rishfaq sërish pas pesë muajsh.

Annegret Spitz ka vërejtur zhgënjimin e azilkërkuesve që kishin krijuar një mit për burokracinë gjermane. "Jo vetëm ky shqiptar, por edhe shumë të tjerë nuk mund ta perceptonin dot si mund të ndodhte kjo, kur nga njëra anë ata marrin mesazhin që duhet të kthehen dhe nga ana tjetër, kur ata duan të kthehen, kjo është e pamundur, ose zgjat gjatë. "Është shumë e vështirë kur nuk mund të planifikosh dot jetën, kur nuk e di se kur mund të gjendet pasaporta, pas një një muaji, pesë muajsh apo më vonë."

Reagim i Zyrës Federale të Migracionit dhe Azilit

Nga njëra anë azilkërkuesit duhet të kthehen, nga ana tjetër autoritetet nuk ua dorëzojnë menjëherë pasaportën. Po i rrëshqet situata nga duart autoriteteve gjermane të mbingarkuara me krizën e refugjatëve? Në një prononcim për Deutsche Wellen të Zyrës Federale të Migracionit dhe Refugjatëve në Nuremberg thuhet se "ka raste, kur përkohësisht një dokument nuk i përgjigjet një procedure të caktuar azili. Arsye për këtë është që Zyra Federale pjesërisht merr pasaporta nga autoritete të tjera, përpara se të shtrohet një kërkesë azili. Në momentin që bëhet kërkesa e azilit, pasaporta futet në dosjen e dokumenteve të azilkërkuesit. Ajo qëndron aty deri në përfundim të procedurës së azilit."

Por tani azilkërkuesit që duan të kthehen në atdhe e kanë një shpresë për gjetjen e shpejtë të pasaportës. Sipas Zyrës Federale të Migracionit dhe Azilit, BAMF "Në BAMF ka disa kohë që për pasaportat që nuk lidhen me asnjë procedurë azili është krijuar një regjistër qendror. Me këtë sigurohet që çdo degë e Zyrës Federale ka akses në çdo kohë tek dokumentet".

Deutsche Welle

 

Ligji “Për regjistrimin e adresave të shtetasve shqiptarë që jetojnë jashtë territorit të Republikës së Shqipërisë” parashikon detyrimin e regjistrimit të adresës brenda 6 muajve nga ardhja në fuqi e ligjit, kujt nuk e bën, “autoritetet do t’i refuzojnë shërbimet e kërkuara”. Dhe nëse nuk ndryshohet kodi zgjedhor, kush vetëdeklaron vendbanimin jashtë shtetit humbet krejtësisht të drejtën e votës në Shqipëri. Teksti i ligjit

Tiranë, 19 shkurt 2016 – Kuvendi i Shqipërisë miratoi të enjten në mbrëmje, me 72 vota pro, 27 vota kundër dhe një abstenim, projektligjin “Për identifikimin dhe regjistrimin e adresave të shtetasve shqiptarë që jetojnë jashtë territorit të Republikës së Shqipërisë”.

Gjatë diskutimit në sallë, lidhur me këtë projektligj, deputeti i PS-së z. Pirro Lutaj sqaroi se kjo nismë ligjore do të rregullojë regjistrimin e popullsisë që jeton jashtë Shqipërisë. “Ne e konsiderojmë tejet të rëndësishëm dhe mbështesim angazhimin e qeverisë për ta miratuar këtë ligj dhe nëpërmjet këtij do të ketë një përgjigje të saktë për numrin e popullsisë, me të dhëna të qarta të shtetasit dhe për adresat e tyre. Qëllimi i këtij ligji është që emigrantët të mos vuajnë si deri sot për të marrë shërbimet nga shteti i tyre qoftë edhe një certifikatë”,- theksoi Lutaj.

Ndërsa deputeti i Partisë Demokratike, z. Oerd Bylykbashi tha se ky projektligj rrezikon përjashtimin e votës së emigrantëve për proceset e ardhshme zgjedhore duke shpjeguar se në bazë të një tjetër ligji kush ka vendbanimin jashtë shtetit humbet vendbanimin në Shqipëri dhe në bazë të kodit zgjedhor kush nuk ka vendbanim në Shqipëri nuk regjistrohet në qendrën e votimit.  “Ne së bashku kemi miratuar ligjin për gjendjen civile, që është miratuar me konsensus. Në atë ligj ne kemi parashikuar që qytetarët shqiptarë të kenë një vendbanim. Me ligjin e Tahirit, 1,5 milionë emigrantëve, ata që e kanë deklaruar vendbanimin tyre në Itali dhe Greqi, e humbasin vendbanimin e tyre në Shqipëri. Po një ligj tjetër nuk i lejon shqiptarët që të votojnë nëse nuk e kanë vendbanimin. Kodi thotë se nëse nuk jeton në Shqipëri, ai nuk regjistrohet në qendrën e votimit”, tha Bylykbashi.

Ministri i Brendshëm Tahiri, që ashtu si në Komision mbrojti projektligjin edhe në sallë, u shpreh sërish se votimi i tij është një “akt patriotik”, që politika shqiptare “ia ka borxh emigrantëve”.

Çfarë parashikon ligji

Ligji i sapomiratuar thotë që shtetasit shqiptarë që jetojnë jashtë vendit për “një periudhë më të gjatë se tre muaj pa ndërprerje, apo më shumë se gjashtë muaj në një vit kalendarik”, kanë detyrim të regjistrohen në “Programin e Regjistrimit të Adresës”. Mund të vetëdeklarohen online ose pranë konsullatave me anë të një formulari vetëdeklarimi që do të vihet në dispozicion, forma dhe përmbajtja e të cilit “do të miratohet me urdhër të përbashkët të ministrit të Brendshëm dhe të Jashtëm”. Përfaqësitë diplomatike e konsullore kanë detyrim të verifikojnë nëse shtetasi shqiptar që paraqitet pranë tyre për të pasur shërbime është regjistruar dhe nëse të dhënat janë të sakta. Regjistrimi i adresave bëhet në mënyrë që aty qytetarëve të mund t’u ofrohen shërbime publike. Sipas nenit 10, në fakt “Autoritetet përgjegjëse i ofrojnë shtetasit shqiptar, në adresën e vetëdeklaruar dhe të konfirmuar, këto shërbime: a) Shërbime të gjendjes civile; b) Shërbime të gjendjes civile në përfaqësitë diplomatike dhe konsullore”.

Por le të shohim pikat e dobëta e më të debatuara në Kuvend të ligjit, që sipas opozitës, me ardhjen në fuqi, i heqin të drejta emigrantëve.

Edhe pse tezën e Oerd Bylykbashkit (PD), sipas të cilës ligji u heq shqiptarëve që nuk regjistrohen në kohë mundësinë e marrjes së disa shërbimeve publike, ministri i Brendshëm në Komision e hodhi poshtë duke thënë se afati nuk ka të bëjë me regjistrimin e adresës por me kohën minimale të qëndrimit jashtë Shqipërisë pas të cilës ata duhet të konsiderohen rezidentë jashtë shtetit, duke lexuar tekstin e ligjit të botuar së fundi në portalin e Kuvendit duket se opozita ka të drejtë.

Në fakt neni 9 në pikat 2 dhe 3 parashikon: “2. Shtetasit shqiptarë, që jetojnë jashtë territorit të Republikës së Shqipërisë, kanë detyrimin e deklarimit fillestar të adresës pranë autoriteteve përgjegjëse, brenda 180 ditëve nga hyrja në fuqi e këtij ligji. 3. Në rast ndryshimi të adresës, shtetasi deklaron adresën e re brenda 60 ditëve nga data e lidhjes së kontratës së qirasë apo shitblerjes së objektit të banimit, si dhe çdo dokument tjetër që provon ndryshimin e adresës”. Ndërsa neni 11 parashikon: “1. Autoritetet përgjegjëse brenda dhe jashtë territorit të Republikës Shqipërisë, në rast konstatimi të mospërmbushjes së detyrimit për deklarimin e adresës së shtetasit dhe të regjistrimit të saj, i refuzojnë atij shërbimin e kërkuar, deri sa shtetasi të përmbushë detyrimin ligjor të vetëdeklarimit të adresës…. 2. Bëjnë përjashtim nga pika 1, e këtij neni, shërbimet me karakter humanitar që përfaqësitë diplomatike dhe konsullore u ofrojnë shtetasve shqiptarë që jetojnë jashtë territorit të Republikës së Shqipërisë”. Nga ana praktike, kjo pikë është e kapërcyeshme, pasi në çastin kur një emigrant shkon e kërkon një shërbim në konsullatë, për shembull, njëkohësisht përmbush edhe detyrimin për deklarimin e vendbanimit duke treguar një dokument të vlefshëm italian.

Një tjetër aspekt i debatuar është përfshirja e emigrantëve në sistemin zgjedhor. Për Tahirin, ligji për regjistrimin e emigrantëve është “gur themeli” që ata të kenë të drejtën e votës atje ku jetojnë. Por, me ligjet e kodin e tanishëm në fuqi, opozita ka të drejtë kur thotë se ligji për regjistrimin e adresave i lë emigrantët pa të drejtë vote, u heq atyre edhe të drejtën që po të duan të kthehen në atdhe për të votuar. Në fakt, sipas nenit 44 të kodit zgjedhor, që qytetari shqiptar të bëjë pjesë  në një listë zgjedhësish duhet veç të tjerash “të ketë vendbanimin në territorin e një prej zonave të qendrave të votimit”.  Ndërsa sipas neneve 14 e 15 të ligjit Nr.10129, të datës 11.05.2009 "Për gjendjen civile", shtetasit “kanë të drejtë të zgjedhin lirisht në cilën banesë të jetojnë zakonisht ose të shumtën e kohës. Banesën, në të cilën shtetasi jeton zakonisht për më shumë se tre muaj pa ndërprerje ose më shumë se gjashtë muaj në një vit kalendarik, ka detyrimin ta deklarojë si vendbanimin e tij” si edhe “nuk mund të deklarojnë njëherazi më shumë se një vendbanim”.

Në të dyja pikat e kundërshtuara të ligjit që sapo u votua në Kuvend, opozita duket se ka të drejtë. Mbetet për t’u parë nëse ky ligj do të pasohet menjëherë me ndryshime në ligjet e tjera ekzistuese. Në të kundërt, rrezikohet që emigrantët shqiptarë jo vetëm të jenë të detyruar të vetëdeklarohen brenda 6 muajve nga ardhja në fuqi e ligjit (në të kundërt do t’u refuzohen shërbimet), por njëherazi me deklarimin e vendbanimit të tyre jashtë Shqipërisë edhe t’u hiqet krejtësisht e drejta e votës, pra të mos e kenë më atë as në letër.

Lexo tekstin e plotë të ligjit të miratuar në Kuvend më 18 shkurt 2016 “Për regjistrimin e adresave të shtetasve shqiptarë që jetojnë jashtë territorit të Republikës së Shqipërisë”

Keti Biçoku
(Ndiqni Shqiptariiitalise.com edhe në Facebook dhe Twitter)

 

 

 

Tahiri: “Ligji është gur themeli që në një të ardhme të votojnë edhe emigrantët”. Opozita: "Ligji kërkon të manipulojë votën dhe cenon të drejtat e njeriut". Të enjten (11 shkurt) projektligji kalon në seancë plenare

Ministri i Punëve të Brendshme Saimir Tahiri në Komisionin për Çështjet Ligjore dhe të Drejtat e NjeriutTiranë, 10 shkurt 2016 - “Projektligji për regjistrimin e adresave të shtetasve shqiptarë që jetojnë jashtë vendit është një detyrë patriotike”. Kështu u shpreh Ministri i Punëve të Brendshme Saimir Tahiri të hënën në Komisionin për Çështjet Ligjore dhe të Drejtat e Njeriut, ku pr/ligjin për regjistrimin e shtetasve shqiptarë që banojnë jashtë Shqipërisë. Për opozitën projektligji është një tentativë manipulimi për zgjedhjet.

Në nisje të punës së komisionit, deputeti demokrat, Oerd Bylykbashi tha se drafti i paraqitur nga Ministria e Brendshme nuk duhet të shqyrtohet nga Komisioni në fjalë, por nga Komisioni posaçëm për reformën Zgjedhore. Kjo, sipas Bylykbashit, pasi ligji në mënyrë ndikon në mënyrë të drejtpërdrejtë në votimin e emigrantëve dhe i cenon të drejtën e votës atyre, ç’ka është dhe shkelje të drejtave të njeriut. “Ne nuk jemi që ky ligj mos të kalojë, por jo në këtë komision, pasi ligji cenon të drejtat e njeriut që lidhen me votën dhe ne kemi rënë dakord të reformojmë kodin zgjedhor dhe për këta arsye ky draft duhet të diskutohet në atë komision”, tha Bylykbashi.

Kërkesa u hodh poshtë nga deputetët e mazhorancës dhe nga Ministri Tahiri i cili mori fjalën për të prezantuar draftin në fjalë.
Ai tha se ligji nuk ka lidhje me procesin zgjedhor, por është një gur themeli, që në një të ardhme të votojnë edhe emigrantët. “Kjo është më pakta që mund të bëjmë. Ne sot nuk kemi asnjë informacion mbi numrin e tyre. Ne sot dimë që në Shqipëri janë regjistruar 4,2 milion banorë, një pjesë e mirë e të cilëve nuk e dimë nëse janë apo jo në Shqipëri. Ne dimë që nga viti 1990 deri më sot kanë lindur 250 mijë fëmijë shqiptarë jashtë vendit dhe vetëm kaq”, tha Tahiri, teksa shtoi se këta shqiptarë nuk gëzojnë asnjë të drejtë, çka tashmë me ligj do t’u garantohet.

“Pra, në qoftë se deri më sot për votën e emigrantëve janë bërë fushata, deklarata politike konstante, janë angazhuar energji pafund nga shoqëria civile, partitë politike, e thuajse çdo mazhorancë, ky është projektligji i parë që shtron gurin e themelit për të shkuar deri atje. Që do të thotë: për të shkuar tek vota e emigrantëve, fillimisht duhet të dimë kush, sa dhe ku banojnë emigrantët tanë. Kështu e ka bërë gjithë bota, nuk është se po shpikim ne. Por nëse kjo ndodh apo jo, varet nga sistemi i reformës në sistemin zgjedhor”, tha Tahiri.

Ai gjithashtu tha se qëllimi ligjit është të zgjerojë diapazonin e shërbimeve për emigrantët. “Ne duam të kthejmë mbrapsht borxhin historik që i kemi emigrantëve. Janë kontributorë të rëndësishëm në buxhetin e shtetit. Por, kur vjen puna tek të drejtat që iu kthejmë mbrapsht është shumë e rëndësishme që ne të bëjmë ç’është e mundur. Dhe kjo është barra e shtetit shqiptar: të bëjmë ç’është e mundur që emigrantët të mos vuajnë për shërbime. Rropaten dyerve të ambasadave, mbajnë radhë me turne, me orë të tëra, e fillojnë radhën në fundjavë për të kapur të hënën. Kjo e gjitha ndodh sepse ne nuk kemi zhvilluar asnjë mundësi për t’u shërbyer emigrantëve siç duhet, me dinjitet. Emigrantët meritojnë dinjitet! Dhe në qoftë se këtë dinjitet nuk ua garanton më së pari shteti shqiptar, është e kotë që ne të bëjmë nacionalistin kur shtete të tjera ua cenojnë dinjitetin shtetasve shqiptarë që jetojnë jashtë”, tha Tahiri, duke i hapur rrugën pyetjeve dhe debateve, të cilat zgjatën për më shumë se dy orë.

Partia Demokratike përmes deputetëve të saj, Oerd Bylykbashki, Eduard Halimi dhe Arben Ristani shprehën shqetësimin e tyre se ligji cenon të drejtën themelore të njeriut votën. Në argumentat e sjella nga të djathtët mbizotëronin dy elemente bazë se përse ky pr/ligj nuk mund të votohej. Sipas Bylykbashi, pr/ligji është në kundërshtim me kodin zgjedhor. “Nuk mund të votojmë një ligj, që i përjashton emigrantët nga vota. Këtë e them se, në kodin zgjedhor thuhet, që lista e zgjedhësve përcaktohet në bazë të vendbanimit brenda territorit Shqiptarë dhe në përkatësi me zonën zgjedhore. Pra, në rast se ky shqiptar jeton jashtë vendit, automatikisht nuk ka zonë zgjedhore dhe për deduksion ky person eliminohet nga votimi dhe i shkelet e drejta”, tha Bylykbashi.

Nga krahu tjetër, Deputeti i PD-së tha se vendosja e afateve, 3-6 muaj për regjistrim është një shkelje tjetër e të drejtave të njeriut. “Nuk ka qeveri në botë që kërcënon qytetarët e saj se po nuk u regjistrove nuk merr shërbimet dhe nuk ka kryeministër që ta pretendoj këtë, pasi nuk mund t’i thuash askujt që ti je shqiptar, por s’mund të marrësh shërbime nga vendi yt”, tha Ristani.

Ndërkohë, ish-Ministri Drejtësisë, Eduard Halimi shtoi se problem i qenësishëm i këtij i drafti është fakti se vetë Ministri nuk e ka të qartë se çfarë po bënë, pasi në letër shkruan diçka tjetër dhe në artikulim thotë diçka tjetër. “Në relacionin e bashkangjitur këtij drafti lexohet dhe është firmosur nga vetëm Ministri Tahiri se, ky pr/ligj ndihmon edhe në futjen e emigrantëve në procesin e votimit, ndërsa këtu ai tha se nuk lidhet me çështjen e votimit, por është një gur themeli, pra është kontradiktor dhe është e qartë, që gjithë ky draft, që futet me nxitim në rend të ditës, që sillet me nxitim për t’u shqyrtuar dhe për të kaluar në senacën plenare fsheh pas dëshirën për të manipuluar listat zgjedhore dhe për këtë faktet janë të shumta”, tha Halimi, duke kujtuar listat zgjedhore në Durrës, Kavajë etj.

Në përgjigje të pretendimeve të deputetëve të opozitës, Ministri i Punëve të Brendshme tha se, lidhur me afatin (3 – 6 muaj), ai ka absolutisht lidhje me kohëzgjatjen minimale të deklarimit të banimit të përhershëm (rezidencës), për të shmangur eventualitetin kur qytetarë shqiptarë shkojnë jashtë Shqipërisë dhe detyrimin që kanë për t’u regjistruar. “Ne themi se duhet të regjistrohen ata qytetarë shqiptarë që shkojnë më shumë jashtë Shqipërisë për kaq kohë që është minimumi. Kjo ndodh në të gjithë botën, është e detyrueshme, përndryshe do të hynim në një rreth vicioz të vetë deklarimit të qytetarëve sa herë dalin jashtë. Gjë që vende shumë të zhvilluara ne Europë e kanë: në qoftë se largohesh për një kohë minimum (që disa vende e kanë 1 muaj disa e kanë pak më shumë), ke detyrimin të shkosh në konsullatë dhe të deklarosh “Unë jam shtetas gjerman, kam ardhur në Shqipëri, do të jetoj këtu një muaj, dhe kjo është adresa ime”. E kanë me detyrim. Ne nuk po shkojmë deri këtu, pasi ky shtet nuk ka këllqe ta bëjë ende. Nëse kjo punë do të kishte nisur 25, 20, 15 apo 10 vite me parë, do të vija me një ndryshim në ligj ku do të thoja: “Cilido shtetas shqiptar që del jashtë Shqipëri për më shumë se sa një muaj duhet të shkojë në ambasadë në shtetin ku do jetojë një muaj, dhe të thotë: “Unë jam Saimir Tahiri, do vij të jetojë këtu për një muaj, dhe kjo është adresa ime për shtetin tim në rast se duhet të më gjejë”. Ju e dini: kjo ka efekte në procesin gjyqësor, në sistemin fiskal, në sistemin e pasurisë së paluajtshme, dhe në tërësi në tregun e pasurisë. Kjo ka efekte të shumëfishta në marrëdhënien mes shtetit dhe qytetarit kudo ku është (rezident jashtë apo në vend)”, sqaroi Tahiri.

Dupetetët e Partisë Socialiste, Ulsi Manja, Dashamir Peza, Pandeli Majko dhe relatori i çështjes, Bashkim Fino u shprehën se qeveria nuk mund të mos votojë një ligj, pasi opozita është e pasigurtë se ç’do ndodhë. “Unë mund të bashkohem me opozitën dhe frikën e saj, por s’ndihem aq i fortë sa t’u them shqiptarëve që jetojnë jashtë, vazhdoni ju s’po ju regjistrojë, vijoni në të errësirë, jepni lekë, por skeni shërbime sepse opozita ka frikë se nuk e votoni atë. Jo, unë them ti regjistrojmë dhe këto ankesa shprehini në komisionin e reformës zgjedhore”, tha Peza. Në të njëjën linjë u shprehën dhe deputetët e tjerë të krahut të majtë.

Në fund, deputetët e mazhorancës votuan projektligjin dhe i hapën rrugë kalimit të tij në seancë plenare të enjten.

Lexo edhe: Regjistrimi i shqiptarëve jashtë atdheut, Qeveria miraton projektligjin

 

 

 

Artikuj te tjere...