Në mbrëmjen e inaugurimit në Milano të “Sport movies tv 2010”, ai që konsiderohet një nga festivalet më të rëndësishëm në botë kushtuar kinematografisë dhe televizionit me temë sportin, u ndanë disa çmime për persona dhe aktivitete kulturore.
Një nga çmimet iu dha Shqipërisë, më saktë Festivalit Ndërkombëtar Veror të Filmit që zhvillohet ne Durrës. Çmimi “World FICTS Challenge” u tërhoq nga drejtoresha e këtij festivali, Anila Varfi. Ajo falënderoi për vlerësimin e lartë dhe tha se një pjesë e këtij çmimi i takon Bashkisë së Durrësit, si mbështetësja kryesore e festivalit.
Në motivacionin e dhënë nga juria, që përbëhet nga disa prej personaliteteve më të shquar të kinemasë dhe sporteve, lexohet se Festivali i Durrësit nderohet si një prej aktiviteteve që po përpiqet të krijojë themelet e një evenimenti me rëndësi në botën e kinematografisë.
Në këtë edicion ishin të pranishëm specialistë dhe delegacione nga 44 vende të botës.
Festivali Ndërkombëtar Veror i Filmit i Durrësit zhvilloi këtë vit nga 29 Gusht deri më 4 Shtator 2010, edicionin e tretë të tij në “Ishullin e Festivalit” pranë detit, si dhe në Amfiteatrin e Lashtë Romak ku publiku ndoqi nën yje produksionet më të mira kinematografike nga e gjithë bota. Ky edicion prezantoi për publikun produksionet më kreative dhe më të rëndësishme të kinemasë bashkëkohore. Në konkurimin zyrtar u prezantuan 17 filma Artistikë të përzgjedhur këta midis produksioneve më të spikatura të këtij viti. Në programin konkurrues ishin dhe 15 filmat e shkurtër të studentëve Shqiptarë. Gjatë ditëve të festivalit u shfaqen dhe katër Filma Artistikë Francezë jashtë konkurrimit në seksionin “Takimet e Ngushta” si dhe dokumetarë në seksionin “Dokumentari Internacional”. Durrësi edhe këtë vit mirëpriti shumë kineastë dhe artistë të huaj të cilët e njohën Shqipërinë dhe këtë qytet të mrekullueshëm përmes filmit.
Ky festival synon të krijojë lidhje të forta midis Shqipërisë, vendeve të Rajonit, dhe Evropës. Evenimenti, i cili manifeston Kinemanë në të gjitha format e saj, mbështet dhe nxit qarkullimin e kulturës vizuale të Evropës dhe Ballkanit. Festivali do të vazhdojë të mbështesë rritjen e marrëdhënieve profesionale në të gjitha fushat e filmit.
