Tropojë. Banorët e zonave të thella kërkojnë ndihmë
Reshjet e vazhdueshme të dëborës dhe erërat e forta që përfshinë rajonin verilindor orët e fundit kanë sjellë izolimin e plotë të 12 fshatrave të komunës së Lekbibajt në rrethin e Tropojës. “Situata është rënduar aq sa edhe akset rrugore këmbësore që lidhin fshatrat me njëri tjetrin janë shkatërruar e dalë jashtë përdorimit”, thotë kryetari i komunës, Gëzim Meshaj.
Ndërkohë, trashësia e dëborës në këtë rajon të largët ka arritur nga 1,60 deri në 2,20 metër. Trashësia e madhe e dëborës dhe mungesa e energjisë elektrike kanë sjellë përkeqësimin e mëtejshëm të gjendjes për banorët e fshatrave të kësaj komune. “Situata është duke u përkeqësuar edhe për faktin se banorëve të fshatrave Bris, Salcë etj u janë mbaruar rezervat ushqimore, gjë që ka rënduar ndjeshëm situatën”, thotë Meshaj. Sipas tij, në kushtet kur situata sa vjen e rëndohet është e domosdoshme ndihma e mjeteve të ushtrisë për hapjen e aksit rrugor që lidh komunën me qytetin e Bajram Currit dhe sjelljen e ndihmave ushqimore për banorët e izoluar.
Një muaj më parë, si rrjedhojë e erërave shumë të forta në fshatrat e kësaj komune u dëmtuan çatitë e 15 banesave, ndërsa 4 shtëpi të tjera u bënë të pabanueshme nga dëmtimet e pësuara.
