“Mirënjohja e Tiranës” nga kryetari i bashkisë Basha, “Hasan Prishtina” nga Shoqata për Kthimin e Shqiptarëve të Shpërngulur nga Trojet e Veta e Prishtinës
Kualifikimi për në fazën finale të Evropianit 2016 është ende larg, por pas përballjes me Serbinë, djemtë e kombëtares shqiptare kanë fituar tashmë dy tituj: një nga Shqipëria e një nga Kosova.
Kryebashkiaku i Tiranës, Lulzim Basha i ka akorduar titullin “Mirënjohja e Tiranës”.
Në Facebook, Basha shkruan: “Kam nderin dhe privilegjin t’i akordoj Kombëtares Shqiptare të Futbollit titullin “Mirënjohja e Tiranës”, me motivacionin: “Përfaqësoi dhe mbrojti denjësisht simbolet kombëtare, duke na dhënë nder dhe bërë krenarë për dinjitetin dhe qytetarinë e treguar, në një situatë aspak miqësore dhe të tensionuar”.
Nga Kosova mbërrin një tjetër vlerësim. Kryetari i Shoqatës për Kthimin e Shqiptarëve të Shpërngulur nga Trojet e Veta, Jahja Lluka, i ka dërguar një letër kreut të Federatës Shqiptare të Futbollit, Armando Duka. “Ju përcjell vendimin e kryesisë së Shoqatës për Kthimin e Shqiptarëve të Shpërngulur nga Trojet e Veta, për ndarjen për Kombëtaren Shqiptare, të Çmimit Tradicional të Shoqatës, që mban emrin ‘Hasan Prishtina’”, shkruan Lluka.
“Ju shkruaj duke ju përcjellë kënaqësinë dhe përgëzimet e mia më të përzemërta, për krenarinë kombëtare, që dha anembanë kombit dhe te shqiptarët kudo që janë, paraqitja dinjitoze e lojtarëve të Kombëtares Shqiptare të futbollit, në ndeshjen kundër Serbisë, në futboll. – thuhet në letër – Unë personalisht dhe anëtarët e aktivistët tjerë të Shoqatës për Kthimin e Shqiptarëve të Shpërngulur nga Trojet e Veta, me seli në Prishtinë dhe që vepron prej 24 vjetësh në të gjitha trojet shqiptare, ndajmë emocionin kuqezi, me të gjithë juve, në këto momente”.
“Kombëtarja Shqiptare, lojtarët e saj dhe mbarë stafi janë më merituesit, që për vitin 2014 të jenë laureatë të këtij çmimi, i cili deri më tani u është dhënë Nënës Shqiptare, Presidentit Klinton, Kryeministrit Bler, Gjeneralit Klark, Familjes Jashari, Familjes Haradinaj, Ambasadorit Uoker, Ambasadorit Uisner”, përfundon letra Jahja Llukës.
