Shoqata Occhio Blu Anna Cenerini Bova organizon një takim të ri të programit të saj “Convivio di Occhio Blu”: nesër, më 22 prill me shkrimtarin Visar Zhiti që do të prezantojë romanin e tij “Perëndia mbrapsht dhe e dashura”, të botuar së fundi edhe në gjuhën italiane me titullin “Il visionario alato e la donna proibita”
Romë, 12 prill 2015 – Shoqata Occhio Blu Anna Cenerini Bova, vazhdon programin e saj “Convivio di Occhio Blu” me takimin me shkrimtarin e njohur Visar Zhiti.
Më 22 prill, në orën 17.30, në librarinë Fandango Incontri (via dei Prefetti 22, Roma) ai do të prezantoi veprën e tij “Il visionario Alato e la donna proibita” (titulli në original “Perëndia mbrapsht dhe e dashura”), i përkthyer nga Elio Miracco dhe i botuar vjeshtën e shkuar nga Rubbettino.
“Il visionario alato e la donna proibita”
Ky roman është një vepër tronditëse dashurie, një tragjedi moderne, forca e së cilës i kapërcen kufijtë e vdekjes, rrok botën e ëndërrimeve të tejme, duke ribërë një realitet më magjepsës se realiteti.
I botuar në Tiranë në vitin 2004 nga “Omsca-1”, ky roman, përveç të tjerash, solli për herë të parë dhe me origjinalitet artistik ngjarje rrëqethëse nga jeta në burgjet e grave dhe nga fushat e shkreta të internimeve, me vërtetësi dhe forcë të lartë artistike, me ndikim të mëpastajmë.
Vepra në vetvete ngërthen dhe shqetësime të tanishme, por mbi të gjitha dashuri shumë, të pamundur, prandaj dhe i ngjan një elegjie të brendshme, me etjen e bukur për jetë.
Romani në italisht, me dëshirë të autorit, mban titullin “Il visionario alato e la donna proibita” (“Vegimtari me flatra dhe gruaja e ndaluar”), ndërsa kopertina është vepër e piktorit të ri Miron Topçiu.
Visar Zhiti
Është një nga shkrimtarët e mëdhenj shqiptarë bashkëkohorë e nga të paktit që është dënuar nga diktatura e Enver Hoxhës nga shkaku i një vepre poetike, me përmbajtje hermetike, e trishtuar dhe për më tepër e kundërt me kanonet e realizmit socialist. Pas 10 vitesh burg e punë të detyruar, me rënien e diktaturës, Zhiti pati mundësinë të botojë gjithë veprën e tij, mes të cilës dhe poezinë e shkruar fshehurazi gjatë burgimit. Përtej një fryme origjinaliteti të sjellë në panoramën letrare ballkanike, romanet dhe esetë e Zhitit kanë meritën se kanë ndihmuar në konsolidimin e lirisë intelektuale dhe të jetës demokratike në Shqipëri. Librat e tij janë përkthyer në mjaft vende, (nga SHBA në Maqedoni, nga Rumania në Itali) duke marrë vlerësime të rëndësishme.
Visar Zhiti ka mbuluar detyra të ndryshme diplomatike e ka qenë edhe ministër i Kulturës.
Convivio di Occhio Blu
Është program i shoqatës Occhio Blu Anna Cenerini Bova që përmban takime periodike debatesh mbi veprën e personaliteteve të spikatura të kulturës dhe të historisë shqiptare, si edhe mbi tema të rëndësishme historike, shoqërore e kulturore për Shqipërinë. Programi i është besuar professor Mauro Geraci-t, antropolog kulturor, i cili prej vitesh i kushton vëmendje të veçantë çështjeve shoqërore ballkanike e atyre shqiptare në veçanti.
