Shpata dhe përkrenarjae Gjergj Kastriotit do të ekspozohen në Pavijonin e Mesjetës të Muzeut Historik Kombëtar më datë 27 nëntor. Sjellja e armëve në Tiranë i ka kushtuar qeverisë shqiptare 100 mijë dollarë
Shpata dhe përkrenarja e Skënderbeut do të mbërrijnë në Shqipëri në datën 20 nëntor. Sipas burimeve nga Muzeu Historik Kombëtar, armët e Heroit tonë Kombëtar do të ekspozohen në datën 27 nëntor në Pavionin e Mesjetës, ku do të qëndrojnë për një muaj e gjysmë në kushte të plota sigurie.
Kostoja e sjelljes së armëve për herë të parë në Shqipëri është 100 mijë dollarë, që u mundësua nga qeveria shqiptare në kuadër të 100-vjetorit të Pavarësisë.
Disa muaj më parë një grup ekspertësh austriakë zhvilluan vizitë në Muzeu Historik Kombëtar për t’u siguruar nëse ky i fundit i plotësonte kushtet e sigurisë dhe mirëmbajtjes së dy relikeve të ralla që ndodhen në Muzeun e Historisë së Artit në Vjenë ose siç njihet ndryshe Kunsthistorisches.
Armët e Skënderbeut, 422 vjet pasi kanë mbërritur në Vjenë, sipas inventarit më të hershëm që ekziston nga viti 1590, që prej muajit nëntor do të mund të vizitohen nga publiku shqiptar. Kërkesa për të sjellë në Shqipëri armët e Skëndërbeut janë bërë disa herë që në kohën e Zogut, së fundi edhe në kuadër të 600-vjetorit të lindjes së Skënderbeut, por për shkak të kushteve dhe të mungesës së sigurisë përgjigjet kishin qenë gjithmonë negative. (sipas ATSh)
Lexo edhe: Shpata dhe përkrenarja e Skënderbeut në Shqipëri. Ratifikohet marrëveshja me Austrinë
