Organizata të të drejtave të njeriut dhe ekspertë ligjorë po shprehin shqetësimin për mundësinë e kalimit të refugjatëve sirianë dhe irakianë, shumica gra dhe fëmijë, nga Greqia në Shqipëri, tani që rruga kryesore e Ballkanit për në Evropë, është bllokuar nga mbyllja e kufijve.
Kjo lëvizje, do të bënte që refugjatët të përdornin trafikantë të qenieve njerëzore të lidhur me grupe shqiptare të krimit të organizuar. Në vitet 1990, pas luftrave të Ballkanit, forcat policore të Evropës i konsideronin grupet shqiptare të krimit të organizuar si ndër aktorët kryesorë në trafikimin e grave për qëllime seksuale në kontinent.
Pas mbylljes së kufijve në Maqedoni, Serbi, Slloveni dhe Kroaci dhe pas përpjekjeve për të kthyer imigrantët mbrapsht në Turqi, rruga alternative për njerëzit e bllokuar në Greqi, do të ishte përmes Shqipërisë duke kaluar Adriatikun për në Itali.
Rruga e Adriatikut për vite me radhë është përdorur nga mafia shqiptare për transport droge dhe trafik armësh, si dhe për trafikim njerëzor.
“Deri tani, nuk ka shenja që ka një valë imigrantësh përmes Adriatikut por është e natyrshme që mbyllja e një rruge në Ballkan, do të hapte një tjetër”, tha Ministri i Brendshëm italian, Angelino Alfano.
Në një intervistë me Zërin e Amerikës, Iman Aoun i organizatës “Save the Children” tha:
“Ne po dëgjojmë që refugjatët në Idomeni dhe zona të tjera në Greqi po flasin për të kaluar përmes Shqipërisë, megjithëse e kuptojnë që është një rrugë më e vështirë. Përveç krimit të organizuar, rreziku shtohet pasi ka më pak agjenci nderkombëtare për të ndihmuar me strehim, ushqime apo shërbime”.
Save the Children dhe organizata të tjera po diskutojnë për vendosjen e ekipeve në Shqipëri.
Zyrtarët bullgarë thanë se kanë në plan të ndërtojnë një gardh përgjatë kufirit të tyre me Greqinë dhe Shqipëria i ka kërkuar ushtrisë dhe policisë italiane ndihmë për të shtuar sigurinë në kufi. Të dyja vendet thonë se janë të shqetësuara se mijëra refugjatët e bllokuar në Greqi mund të fillojnë të mbërrijnë aty pas mbylljes së pjesëve të tjera të Ballkanit.
Gjatë luftës së Ballkanit në vitet 1990, grupe shqiptare të krimit të organizuar detyruan mijëra gra në prostitucion, i trafikuan ato në vendet e pasura të Evropës veriore, në qytete si Londra dhe Milano ku janë bërë edhe një forcë dominuese në industrinë e prostitucionit në Evropën perendimore.
Matteo Albertini, një ekspert i grupeve kriminale italiane dhe shqiptare bie dakort me shqetësimet e grupeve të të drejtave, se “ka rreziqe për abuzim”. Ai beson se shumë do të varet nga fakti në se do të ketë mbyllje të mëtejshme të kufijve. “Kjo do ta bënte situatën edhe më të vështirë dhe mbërritja e imigrantëve në Shqipëri mund të rigjallëronte rrugën e kontrabandës” përgjatë Adriatikut duke lidhur grupet italiane dhe shqiptare të krimit të organizuar.
Që nga vitet 1990, rruga e Adriatikut është përdorur kryesisht për kontrabandën e drogës dhe të armëve dhe jo shumë për trafikimin e njerëzve, thotë Albertini, që shkruan për faqen elektronike Balkansanalysis.com dhe jep leksione në Universitetin e Bolonjas.
Perspektiva në rritje e kalimit të refugjatëve në Shqipëri vjen disa javë pas njoftimit të agjencisë policore evropiane se gati 10 mijë fëmijë imigrantë të pashoqëruar janë zhdukur gjatë dy viteve të fundit në kontinent.
Shefi i Europolit Brian Donald paralajmëroi se rrjetet e krimit të organizuar dhe trafikantët e seksit ka të ngjarë të jenë pas shumë prej këtyrezhdukjeve.
Në maj të vitit 2015, Ministri i Jashtëm Italian pranoi se 4.840 të mitur të pa shoqëruar, që ishin shpëtuar nga policia bregdetare italiane duke kaluar nga Libia, ishin zhdukur. Kreu i divizionit të rojes bregdetare libiane, koloneli Rida Benissa, i tha Zërit të Amerikës vitin e kaluar se ai dyshonte se mafia italiane, e cila ka lidhje të ngushta me trafikantët shqiptarë, ka dorë në trafikimin e fëmijëve. / VoA
