Ministria e Brendshme jep udhëzimet (në një kohë rekord) pas vendimit të Këshillit të Shtetit. Do të kontrollohen edhe kërkesat e paraqitura gjatë muajve të shkuar
Romë, 20 shtator 2016 – “URGENTISSIMO”. Me një urgjencë të kuptueshme, ministria e Brendshme u ka komunikuar të gjitha Kuesturave ringjalljen e taksës mbi lejet e qëndrimit.
Kur, në maj, kontributi për lëshimin e përtëritjen e dokumenteve të qëndrimit (nga 80 deri në 200 euro) u hoq nga një sentencë e TAR-it, ministria e Brendshme nuk u merakos shumë të lajmëronte sa më parë kuesturat për risinë duke lënë për javë të tëra zyrat e imigracionit e qytetarët e huaj pa asnjë lloj informacioni. Vetëm në korrik, dhe tërthorazi, u mësua që kuesturat po i përshtateshin vendimit e që po pranonin e përpunonin praktikat pa kërkuar taksën.
Më 14 shtator, ama, Këshilli i shtetit pezulloi sentencën e TAR-it, duke risjellë në fuqi taksën të paktën deri më 13 tetor kur do të mbahet një senacë mbi këtë çështje e do të jepet vendimi përfundimtar mbi pezullimin. Nuk kanë kaluar as dy ditë dhe Drejtoria e Imigracionit e Departamentit të Sigurisë Publike nisi një mesazh “shumë urgjent” që u shpjegon të gjithë kuestorëve pasojat e këtij vendimi të ri.
Kuesturat, thotë mesazhi, “do të kenë kujdes të lëshojnë e të përtërijnë lejet e qëndrimit vetëm nëse është paguar, nga i interesuari, shuma e parashikuar nga neni 5 paragrafi 2/ter, i tekstit unik për imigracionin”. E do të duhet “të bëjnë të njëjtin verifikim edhe për kërkesat e paraqitura para 14 shtatorit që akoma nuk janë mbyllur me lëshimin e dokumentit të qëndrimit”.
Me fjalë të tjera mesazhi thotë që kush kërkon sot e tutje lejen e qëndrimit duhet të paguajë taksën, nga 80 në 200 euro, përndryshe kërkesa nuk do të shqyrtohet. Por edhe kërkesat e paraqitura gjatë muajve të shkuar pa paguar taksën do të bllokohen. Deri kur? Këtë ministria nuk e thotë, por është e mundur që t’u kërkohet të interesuarve të paguajnë taksën për të shbllokuar praktikat.
Dhe e gjithë kjo ndërsa afrohet 13 tetori, kur mund të ketë sërish të papritura në kah të kundërt.
Elvio Pasca
Lexo mesazhin shumë urgjent të nisur kuesturave
