Përplasja mes Italisë dhe Këshillit të Europës po ashpërsohet. Pas kritikave të shprehura nga Roma dhe Kopenhaga për disa vendime të Gjykatës Evropiane për të Drejtat e Njeriut (GJEDNJ) në lidhje me emigracionin, tani është Komisioni kundër Racizmit dhe Intolerancës (ECRI) që hap një front të ri polemikash duke kritikuar forcat italiane të rendit.
Shkëndija që ndezi polemikën ishte kërkesa e presidentit të ECRI, Bertil Cottier, që Italia të kryejë sa më shpejt një studim të pavarur mbi profilizimin racor nga ana e policisë. Sipas raportit të përditësuar në prill 2024, kontrollet bazuar në ngjyrën e lëkurës, përkatësinë etnike ose fenë janë në rritje në të gjithë Europën. Cottier i bëri thirrje qeverisë italiane të marrë masa konkrete dhe urgjente.
Kryeministrja Giorgia Meloni reagoi menjëherë, duke i quajtur akuzat “të turpshme”, të mbështetura mbi “paragjykime të dukshme” dhe një “qasje ideologjike”. Meloni theksoi episodet e shpeshta të sulmeve ndaj agjentëve, shpesh nga emigrantë të parregullt, dhe lavdëroi punën e policisë me guxim dhe respekt për ligjin.
Edhe Presidenti i Republikës, Sergio Mattarella, mori fjalën: ai thirri për të enjten kryepolicin Vittorio Pisani për të riafirmuar publikisht besimin e shtetit te forcat e rendit, duke nënvizuar përkushtimin ndaj vlerave kushtetuese dhe demokratike.
Reagimet politike nuk munguan. Lega e quajti Këshillin e Europës një “organizatë të kotë që duhet shpërbërë”, ndërsa zëvendëskryeministri Antonio Tajani i quajti komentet “qesharake dhe fyese”, duke mbrojtur se policia italiane është ndër “më të respektueshmet ndaj pakicave”. Ministri i Brendshëm Matteo Piantedosi e quajti ECRI një “organizatë të dëmshme” dhe vuri në dyshim dobinë e saj.
Polemika mbërriti edhe në Parlament, ku kryetari i grupit të Fratelli d’Italia, Galeazzo Bignami, i quajti rekomandimet “të papranueshme dhe të turpshme”. Nga opozita, Piero Fassino (Pd) kërkoi të mos instrumentalizohen kritikat dhe të lexohet me kujdes raporti. Edhe Elena Bonetti (Azione) mbrojti rolin e Këshillit të Europës si një garant për të drejtat mes shtetit dhe qytetarëve.
As përgjigjja e sekretarit të përgjithshëm të Këshillit të Europës, Alain Berset, nuk i uli tonet. Duke iu përgjigjur një letre të dërguar nga nëntë vende të udhëhequra nga Italia dhe Danimarka kundër GJEDNJ, Berset deklaroi: “Në një shoqëri të drejtuar nga shteti ligjor, asnjë organ gjyqësor nuk duhet të ndikohet nga presioni politik”.
Tema e profilizimit racor dhe respektimi i të drejtave të njeriut mbeten kështu në qendër të debatit evropian, me Romën dhe Strasburgun gjithnjë e më të largëta.
