Ndez polemika fletëpalosja që nga java e ardhshme grupi Fratelli d’Italia i Këshillit krahinor të Toskanës do të shpërndajë dorazi në zonat me më shumë imigrantë
Romë, 29 tetor 2014 – Nga “fol italisht” te “Krishtlindjet e Pashkët duhen festuar”, nga “gruaja nuk preket” të “mos bëj pis”. Janë këto “Dhjetë Porositë e Moisiut” sipas partisë së djathtë italiane Fratelli d’Italia. I përmban një fletëpalosje që nga java e ardhshme grupi i këshillit krahinor toskan i kësaj partie do të dorëzojë në zonat me përqendrim të lartë të imigrantëve. Mes rregullave që, sipas partisë së Giorgia Melonit, është e udhës t’u kujtohen imigrantëve (sepse natyrisht, italianët vetë kanë sjellje qytetare të kulluar), gjenden edhe “fëmijët shkojnë në shkollë”, “mos rri në vende publike me fytyrë të mbuluar”, “lutju kujt zot të duash por mos shqetëso”, “të pështysh përdhe është e pakëndshme” deri edhe porosia për “therjen e mishit në mënyrë të përgjegjshme”.
“Italia ju ka hapur dyert, tani nëse doni të qëndroni duhet të respektoni rregullat tona” shpjegon fletëpalosja që titullohet “Në Itali ne sillemi kështu”, e përkthyer edhe në gjuhën arabe.
“Me këtë nismë duam të mbrojmë dhe të përligjim traditat dhe zakonet e Italisë – shpjegon kryetari i grupit krahinor të këshilltarëve të forcës Fratelli d’Italia Giovanni Donzalli dhe këshilltarët Paolo Marcheschi e Marina Staccioli – Të respektosh zakonet e një vendi është thjesht një pikënisje për të mund të qëndruar në atë vend: kush i nuk pëlqen ato mund të largohet pa asnjë problem”.
“Fletëpalosja e Fratelli d’Italia është një nxitje për urrejtje dhe ksenofobi – shprehet parlamentarja toskane Marisa Nicchi kryetare e grupit SEL në Komisionin e Çështjeve Sociale të Dhomës së Deputetëve – Eksponentët e kësaj partie duhet të tërheqin menjëherëë këtë fletëpalosje dhe të mos e shpërndajnë në qytet. I bëjmë thirrje UNAR-it (Zyra kombëtare kundër diskriminimeve raciale e Kryeministrisë), që të analizojë tekstin”. “Dhjetë pikat e fletëpalosjes – përfundon parlamentarja Nicchi – përmbajnë përgjithësime të pabesueshme mbi imigrantët”.
