Ja certifikatat që dëshmojnë njohjen e italishtes në nivelin A2. Gjatë testeve të Sporteleve Unike nuk e kanë kapërcyer provën e italishtes 13% e atyre që e kanë provuar, por me dallime të mëdha nga një provincë në tjetrën
Romë 5 qershor 2011 – Nga 9 dhjetori i shkuar, njohja në nivelin bazë e italishtes është bërë një nga kriteret për marrjen e lejeqëndrimit BE për qëndruesit afatgjatë, të ashtuquajturën karta e qëndrimit.
Testi quhet i marrë nëse i huaji ka një diplomë të shkollës së mesme të marrë në Itali apo nëse ka frekuentuar në Itali një kurs universitar, master apo doktoraturë. Në raste të tjera ka vetëm dy mundësi për të treguar njohuritë e gjuhës: ose duke dhënë provimin e organizuar nga Sportelet Unike të imigracionit pranë Qendrave Territoriale të Përhershme (CTP), ose duke paraqitur një certifikatë të njohjes së italishtes, të paktën, në nivelin A2, të lëshuar nga Shoqëria Dante Alighieri, nga Universitetet për të huajt i Perugias dhe Sienës, ose nga Universiteti i Studimeve Roma Tre.
Pikërisht mbi këto dëshmi, deri para pak kohësh kishte disa paqartësi, ndaj ministria e Brendshme u ka nisur fotokopjet e këtyre certifikatave të gjitha kuesturave, të shoqëruara nga skeda me karakteristikat dhe mënyrat e lëshimit. Këto certifikata u jepen vetëm atyre që marrin provimin e njohur nga të katër entet, ndaj në këtë pikë është mirë të informohen të gjithë ata që duan të nisin një kurs italishteje.
Ndërkaq mund të bëhet një bilanc i parë i provimeve të italishtes të organizuara nga Sportelet Unike dhe nga CTP-të, që kanë nisur në shkurt 2011.
Sipas të dhënave të ofruara më 16 maj nga e përditshmja Il Sole 24 Ore, në mbarë Italinë janë prenotuar on-line për këtë provim 51.236 të huaj, por deri tani kanë dhënë provimin diçka më shumë se 20 mijë vetë, nga të cilët nuk e kanë marrë 13,6% e tyre.
Prefektura që ka pasur më shumë kërkesa është ajo e Milanos (rreth 7.000), e ndjekur në distancë nga Roma (2.544) dhe Brescia (2.312). Renditja e tre prefekturave të para nuk ndryshon edhe po të shihen ato ku në të vërtetë janë mbajtur më shumë teste gjuhe: e para renditet gjithnjë Milano ku e kanë dhënë provimin 1.461 të huaj. Në Romë kanë dhënë këtë provim 1.070 vetë, ndërsa në Brescia 863.
Sa për mbarëvajtjen e këtij provimi, nuk e ka marrë 13,6% e të huajve të testuar, por me ndryshime të thella nga një prefekturë në tjetrën. Në Prato, Caserta, Lecce dhe Rieti provimin e kanë kaluar të gjithë të huajt që e kanë bërë. Ndër provincat e mëdha, në Torino regjistrohet përqindja më e lartë e të huajve që e kanë marrë, 96,5%. Vlera pak a shumë të ngjashme edhe në Romë (96%) dhe në Napoli (95). Përqindje shumë më të ulëta të kalimit të kësaj prove regjistrohen në Verona (65%), Venecia (70%) dhe Vicenza (72%).
Procedura e prenotimit nuk ka shkuar gjithnjë mirë: e tregon fakti që rreth 4 mijë vetë në gjithë Italinë nuk janë paraqitur në provim. Kjo ka ndodhur jo vetëm për arsye personale apo pune por edhe për shkak se letrat e porositura me vendin, datën dhe orën e provimit kanë mbërritur vonë. Sa për kohën e nevojshme të organizimit të provimit, ministria e Brendshme njofton që në tre të katërtat e rasteve takimi është dhënë brenda 60 ditëve nga data e prenotimit on-line. Në këtë aspekt tregohen të shkathëta prefekturat eRomës, Torinos, Venezias, Vicenzas dhe Veronës. E kundërta ndodh në Varese, Milano e Brescia ku shumica e datave të privimit jepet pas dy muajve nga data e prenotimit.
Shkarko:
Sqarimet e ministrisë së Brendshme
Fotokopja dhe karakteristikat e certifikatës Società Dante Alighieri
Fotokopja dhe karakteristikat e certifikatës Univ. per stranieri di Perugia
Fotokopja dhe karakteristikat e certifikatës Univ. per stranieri di Siena
Fotokopja dhe karakteristikat e certifikatës Univ. Roma Tre
