Me edicionin e14-të të Panairit të Librit mbërrijnë pranë publikut shqiptar botimet e reja e krah tyre edhe diskutimi i temave profesionale, të komunikimit, konferencat, apo ekspozita pikture. I ftuar, poeti e gazetari italian i të përditshmes Corriere della Sera, Sebastiano Grasso. Mbetet jashtë panairit libri i Edi Ramës “Kurban”
Tiranë, 3 nëntor 2011 – Në edicionin e 14-të të Panairit të Librit që hapet më 9 nëntor do të marrin pjesë 90 ekspozues, kryesisht subjekte botuese shqiptare, por edhe disa Universitete dhe shtëpi botuese të huaja, që për pesë ditë do t’i paraqesin lexuesve titujt e rinj dhe botimet e viteve të kaluara.
Sipas kryetarit të Shoqatës së Botuesve Shqiptarë, Petrit Ymeri, këtë vit është vënë re një ulje e dukshme e botimeve të reja, 965 deri në fund të tetorit.
Në Panair, që do të qëndrojë i hapur deri në 13 tetor në Pallatin e Kongreseve, në sipërfaqen prej 1.650 metra katrorë, përveç prezantimit të librave në stendat përkatëse të shtëpive botuese, do të zhvillohen dhe rreth 40 promovime autorësh e librash të rinj.
Edhe këtë vit nuk do të mungojnë në Panairin e Librit botuesit nga Kosova, të cilët shënojnë në këtë edicion numrin më të madh të pjesëmarrjes, 14 shtëpi botuese. Tituj të rinj botimesh do të prezantohen edhe nga Maqedonia, Instituti Italian i Kulturës dhe rrjeti i botuesve dhe përkthyesve “Traduci”. Sipas Petrit Ymerit në edicionin e 14-të të panairit, libri shkollor do të zërë më pak vend se vitin e kaluar.
Gjatë Panairit të Librit, disa prej shtëpive botuese ofrojnë libra me çmime të lira, një politikë kjo, që sipas kryetarit të SHBSH-së, Ymeri, është zgjedhje individuale e shtëpive botuese.
Ditët e fundit, shtypi shqiptar ka përcjellë një debat lidhur me mungesën në Panair të shtëpisë botuese “Dudaj”. Kjo edhe për faktin që kjo shtëpi ka botuar librin e kryetarit të Partisë Socialiste, Edi Rama, “Kurban”, që me mospjesëmarrjen e entit botues në Panair, nuk do të prezantohet.
Në serinë e aktiviteteve nuk do të mungojnë diskutimi i temave profesionale, konferencat, apo dhe ekspozitat e pikturës nën drejtimin e Robert Aliaj. Një ndër të ftuarit e këtij edicioni do të jetë poeti e gazetari italian në Corriere della Sera, Sebastiano Grasso, i cili vjen për herë të parë i përkthyer për lexuesit shqiptar nga shtëpia botuese “EUGEN”.
Ashtu si dhe në edicionet e tjera, edhe përfundim të këtij edicioni, do të ndahen çmime si çmimi “Libri më i mirë”, “Përkthimi më i mirë”, “Libri më i mirë për fëmijë”, “Libri më i mirë studimor”, “Stenda më e mirë grafike”, një çmim ky i fundit që do të jepet nga gazetarët.
Panairit i Librit “Tirana 2011” do të qëndrojë i hapur për publikun nga data 9 deri në 13 tetor, në orën 09:00-21:00, ku veç të tjerash, lexuesit do të kenë mundësi të takojnë pranë stendave të shtëpive botuese edhe autorë të ndryshëm.
Panairi i librit është një organizim i Shoqatës së Botuesve Shqiptarë dhe është cilësuar si një nga ngjarjet më të rëndësishme kulturore në vend. Ky eveniment mbledh çdo vit botues, shkrimtarë e përkthyes shqiptarë për të promovuar botimet e reja shqiptare.
