Më 17 shkurt u çel në Romë cikli i veprimtarive “Vendi përballë – Shqiptarët e Italisë festojnë 100 vjetorin e Pavarësisë”
Romë, 20 shkurt 2012 – “Shqipëria, vendi përballë”, cikli i aktiviteteve që po zhvillohen në Romë, në Muzeun e Qytetërimit Romak, me rastin e 100 vjetorit të shpalljes së Pavarësisë, u përurua të premten e shkuar. Ishin të pranishëm përfaqësues të ambasadës së Shqipërisë e asaj të Kosovës në Romë, autoritete të Bashkisë së Romës, miq shqiptarë, arbëreshë e italianë.
Pasditen e hapi ambasadori i Shqipërisë në Romë që u uroi mirëseardhjen të pranishmëve dhe pas tij morën fjalën edhe organizatorët e veprimtarive dhe përfaqësues të Bashkisë së Romës e të Muzeut.
Më pas u mbajt kuvendi mbi rolin e arbëreshëve në 150 vjetorin e Bashkimit të Italisë dhe 100 vjetorin e Pavarësisë së Shqipërisë.
Mbrëmja u mbyll me shfaqjen e dokumentarit “Albania il paese di fronte” të Roland Sejkos në sallën Planetario të muzeut.
Në sallat madhështore të Muzeut të Civilitetit Romak të pranishmit kanë admiruar veprat e rreth 20 artistëve shqiptarë në Itali, me kurator artistin Xhovalin Delija. Një interes të veçantë treguan edhe për ekspozitën me dokumente të rëndësishme të historisë së Shqipërisë të Arkivit qendror të Shtetit shqiptar, për fotografitë e mrekullueshme të ekspozitës së Alket Islamit mbi bukuritë natyrore të Shqipërisë dhe për ekspozitën fotografike të realizuar nga studentët e shoqatës USAB.
Javët e kulturës janë organizuar nga Ambasada shqiptare, përfaqësuesi i komunitetit shqiptar në Konsultën e të huajve në Romë, Edmond Godo, dhe ‘Bota Shqiptare – Gazeta e shqiptarëve në Itali’ e shqiptariiitalise.com. Në realizimin e veprimtarive kanë dhënë një kontribut të vyer Arkivi Qendror i Shtetit shqiptar, shoqatat e studentëve USAB e ASUF, shoqatat Integra ONLUS e Ejona Milano, komuna Vaccarizzo Albanese, kooperativa Xenia dhe të gjithë artistët pjesëmarrës me veprat e tyre.
Aktivitetet “Vendi përballë” do të vazhdojnë deri në ditët e para të marsit. Aktiviteti i ardhshëm është seminari që do të mbahet të enjten më 23 shkurt (ora 16.00) “Shqiptarët e Italisë 20 vite më pas” me pjesëmarrjen e Franco Pittau, Rando Devole, Alessandro Leogrande, Edmond Godo, Aldo Renato Terrusi, Darien Levani e Keti Bicoku.
{gallery}inaugurazione-17feb-roma{/gallery}
