Vetëm 25 vjeç, shef pastiçerie në “Il luogo di Aimo e Dania”, është vlerësuar nga Guida Identità Golose 2013 si shefi pastiçer më i mirë i vitit
Romë, 4 shkurt 2013 – Është Mario Peqini, djali 25 vjeç nga Durrësi, – që prej disa vjetësh punon në restorantin “Il luogo di Aimo e Dania” në Milano, – shefi pastiçer më i mirë i Italisë për vitin 2013. E thotë “Identità Golose”, guida përvitshme e restoranteve më të mira të Italisë, Europës dhe Botës që vlerëson kuzhinën dhe pastiçerinë e nivelit më të lartë.
Për Mario Peqinin, i ardhur në Itali me prindërit kur ishte fëmijë, guida në fjalë jep këtë motivim: “Ka jetuar gjysmën e jetës në Shqipëri, nga ku u largua bashkë me familjen kur ishte vetëm 13 vjeç. Me babanë magazinier dhe nënën rrobaqepëse, me pengesën e parë italishten, ka studiuar rëndshëm për t’ia dalë mbanë. Në stafin e ‘Il luogo di Aimo e Dania’, krijon ëmbëlsirat në sintoni të plotë me pjatancat e kripura të ofruara nga restoranti”.
Mario është nga Durrësi dhe aty ka kaluar fëmijërinë e tij. Më pas, “për një sërë arsyesh të forta” siç thotë ai vetë, u transferua në Milano, ku jeton edhe sot, me babanë magazinier, nënën rrobaqepëse, dhe një motër më të vogël. Si shumicës dërrmuese të emigrantëve, edhe prindërve të tij iu desh të bënin sakrifica për të mbajtur familjen, për të çuar fëmijët në shkollë.
Në këtë periudhë krize, veçanërisht në punësimin e të rinjve, Mario është një nga ata djem me fat që jo vetëm ka një punë, por gjen kënaqësi në të, e ka pasionin e vet. “Në rrugën time kam pasur fatin të takoj gjithnjë persona të drejtë” thotë ai, por ndoshta më i drejti është vetë ai.
K.B. / Shqiptari i Italisë
Lexo edhe: Mario Peqini që ëmbëlson Milanon
