Me një shënim të botuar në profilin e tij facebook edhe shkrimtari italian Saviano përshëndet rezultatin zgjedhor në Shqipëri.
Ja ç’shkruan ai:
Shqipëria është një vend kaq pranë, fatet e të cilit janë të gërshetuara me Italinë.
Për Shqipërinë nuk mund të thuhet kurrë se “le të flasim më mirë për çka ndodh në Itali’, sepse Shqipëria është një vend i lidhur në kulturë, histori dhe gjeografi me Italinë.
Të dielën, më 23 qershor, u mbajtën zgjedhjet parlamentare në Shqipëri, që është demokraci e re dhe në rrezik.
Ndërsa akoma votohej, pati të shtëna në Laç dhe u vra një eksponent i qendrës së majtë.
Edi Rama, socialist dhe lider i koalicionit të qendrës së majtë, në fund të votimit deklaroi se koalicioni i tij është në rrugën e duhur për të marrë ato vende në parlament që kishte parashikuar. Por më pas, kryeministri Sali Berisha në largim, nisi të pretendojë fitoren, duke mos njohur humbjen.
Rezultatet zyrtare i japin 57,7% koalicionit të Edi Ramës dhe 39,4% atij të udhëhequr nga Sali Berisha.
Shqipëria, që në këto dekada ka ditur të transformohet, duke dalë nga një diktaturë e tmerrshme komuniste e Enver Hoxhës, është një vend i mbushur me talente dhe mundësi.
Rezultati i këtyre zgjedhjeve dhe ndryshimi që shpresojmë se do të sjellin, janë jetike për të frenuar korrupsionin e Berishës dhe për të nisur luftën e vërtetë ndaj bandave mafioze shqiptare.
Është koha t’i lejohet Shqipërisë të nisë ndryshimin që do e sjellë në Europë.
Simpatia ime shkon për të gjithë lexuesit shqiptarë, që më ndjekin, dhe që e di që në këto kohë janë të angazhuar në respektimin e demokracisë.
