Aeroporti i Rinasit, apo më saktë Shoqëria Tirana International Airport (TIA) sh.p.k., ka ngritur padi civile ndaj kompanisë shqiptare Belle Air. Shkaku është mosrespektimi i kontratës nga Belle Air për përdorimin e aeroportit dhe borxhi prej 296.917 eurosh i krijuar nga kompania ajrore në dëm të aeroportit.
Siç shihet në foto (shtyp mbi të për ta zmadhuar) çështja gjyqësore mban datën 10 janar 2014 dhe mbërrin pas një muaji e gjysmë nga data kur vetë Belle Air ka kërkuar në gjykatë shpalljen e falimentimit gjë që u ka shkaktuar jo pak probleme mijëra pasagjerëve.
Në objektin e padisë “për shkaktim dëmi” të TIA-s lexohet “Përmbushja e detyrimit kontraktual nga ana e të Paditurit ndaj Paditësit të detyrimit prej euro 296.917 (dyqind e nëntëdhjetë e gjashtëmijë e nëntëqind e shtatëmbëdhjetë euro) dhe kamat vonesat përkatëse mbi këtë detyrim që nga dita e Undjes së detyrimit, të siguruar nëpërmjet Kontratës së Hipotekës me Nr. 453 Rep. dhe Nr. 78/4 Kol, datë 12/02/2013”.
Mbetet sidoqoftë e pakuptueshme pse TIA i ka lejuar kompanisë Belle Air të arrijë këtë shifër të lartë borxhi pa e detyruar më parë, kur ajo kishte shumicën e fluturimeve që bëheshin në aeroport, të shlyente detyrimet, qoftë edhe duke e paditur siç ka bërë këtë fillim viti.
Shqiptari i Italisë
(Ndiqni Shqiptariiitalise.com edhe në Facebook dhe Twitter)
