Aksidenti i Himarës. Del nga koma Eriselda Gubere

Florije Peci dhe Eriselda Gubere u nisën më 24 maj  drejt Austrisë ku po i nënshtrohen një mjekimi më të specializuar.

Rreth orës 14.00 të ditës së enjte, ka dalë nga koma Eriselda Gubere, njëra nga dy vajzat e plagosura rëndë në aksidentin e Qafës së Vishës në Himarë. U deshen gati tre javë për të arritur këtë rezultat. Mjekët austriakë të spitalit ku ajo është dërguar për kurim bashkë me një shoqe, edhe ajo në gjendje të rëndë shëndetësore, bëjnë të ditur se vajza nuk e mban mend aksidentin.

Pak ditë pas mbërritjes së dy të plagosurave në Austri, u bë një përpjekje, pa sukses, për zgjimin e tyre. Është ende në koma vajza tjetër, Florije Peçi,që u çua bashkë me Eriseldën në Austri.

Në aksidentin e Qafës së Vishës një autobus me 33 studente (të gjitha vajza) të Universitetit “Aleksandër Xhuvani”, dega Letërsi, ra nga rruga në greminë nga një lartësi prej rreth 80 metrash. Humbën jetën 13 persona dhe u plagosën 26 të tjerë. Sipas raportit të Policisë së Shtetit, “nuk ka pasur dëmtim të sistemit të drejtimit apo frenimit por shkak ka qenë shpejtësia e autobuzit. Ajo ka qenë më e madhe se ajo e lejuar në këtë aks rrugor dhe drejtuesi i mjetit ka reaguar me vonesë për të ulur shpejtësinë e mjetit”.