Këtë herë, dy shkodranet që jetojnë në Santa Monica të ShBA-ve, Greta dhe Vilma Zenelaj
Tiranë, 8 shtator 2011 – Në vazhdën e takimeve me personalitete shqiptare e të huaj të Hollywoodit (Coppola e Dushku, sa për të përmendur dy nga këta të javëve të fundit), kryeministri Berisha ka pritur dje dy artiste shqiptare, Greta Zenelaj dhe Vilma Zenelaj, që deri pak ditë më parë ishin pjesëmarrëse në Festivalin Ndërkombëtar të Filmit të Durrësit, ku u paraqitën me dy produksione të tyre, komedinë “Çfarë të bëj unë tani?” dhe me melodramën “Në pyll”.
Gjatë takimit edhe kë to dy artiste njohën kryeministrin me projektin e tyre të ardhshëm që qenka realizimi i një filmi me tematikë për 2 prillin e vitit 1991. Ky film do të mbajë titullin “Shqipe” ose “Eagle”. Gjatë qëndrimit në Shqipëri ato kanë vizituar edhe qytetin e Shkodrës, prej nga do të nisin xhirimet e filmit të tyre të ardhshëm.
Sipas një protokolli tashmë të konsoliduar, kryeministri Berisha përgëzoi dy artistet shqiptare, si për dy filmat me të cilat u prezantuan në Festivalin Ndërkombëtar të Filmit, dhe për iniciativën për realizimin e filmit të tyre të ardhshëm mbi ngjarjet e 2 prillit 1991.
Duke u uruar suksese në realizimin e këtij projekti, Kryeministri Berisha u shpreh se ndihet mirë që artistët e rinj shqiptar, të cilët po bëjnë emër edhe jashtë atdheut, me talentin e tyre janë të pranishëm edhe në vendlindje.
