Pak ditë më parë dukej se ai po ndiqej më vëmendje nga Atalanta dhe Bologna të cilat siç duket ia kanë vënë syrin lojtarit shtatlartë të kombëtares shqiptare, i cili ka edhe një vit kontratë me Cezenën. Por duke u bazuar në lajmet e ditëve të fundit Erjon Bogdani paska dhënë aprovimin e tij për të kaluar në klubin e La Spezias. Dihet që gazetat sportive gjatë verës, kur kampionati ka mbaruar dhe ziejnë shitblerjet e lojtarëve, mbushin faqet me lajme nga më të habitshmet, të cilat një ditë më pas përgënjeshtrohen ose nuk përmenden më.
Mjafton të hapësh faqet e gazetave shqiptare, dhe ky lajm lexohet ndryshe. Sipas gazetës Shqip, “Persona të afërt me sulmuesin bëjnë të ditur se Bogdani as që e ka marrë në konsideratë këtë skuadër”. Kujt t’i besosh?
Thashethemet do të vazhdojnë gjatë, në faqet e gazetave në forumet e ndryshme në internet e ndoshta dhe nën çadrat e plazhit. Tregu mbyllet të mërkurën, 31 gusht 2011. Deri atëherë emrat e lojtarëve do të lakohen në shumë gjuhë, deri sa të mbërrijë komunikata zyrtare e klubit blerës dhe paraqitja zyrtare e futbollistit të radhës.
