Sasi të mëdha droge vazhdojnë të mbërrijnë nga Shqipëria drejt brigjeve të Italisë. Pas 14 kilogramëve marijuhanë të zbuluar nga Guardia di Finanza në portin e Barit dje paradite, një sasi shumë më e madhe, plot 310 kg, zbulohet edhe në portin e Brindisit.
Në të dyja rastet droga vinte nga Shqipëria, e para nga Durrësi e dyta nga Vlora, dhe ishte fshehur në kamionët e ngarë nga dy shqiptarë që janë arrestuar.
Në veçanti, 310 kg marihuanë të mbërritura në Brindisi ishin fshehur mes disa pllakash të mëdha xhami që transportonte kamioni i cili duhet të vazhdonte rrugën drejt Venecias. Shoferi, 56 vjeçari shqiptar Leandër Janina (të paktën kështu japin identitetin e tij) u arrestua menjëherë.
Duket se në bashkëpunim me kriminalitetin vendas, ai shqiptar po fiton gjithnjë e më shumë terren në trafikun ndërkombëtar të drogës. Kjo vihet në dukje qoftë nga një raport vjetor i policisë italiane, sipas të cilit në vitin 2011 janë paditur rreth 1.700 shqiptarë për trafik droge, qoftë nga Zyra e Kombeve të Bashkuara për Drogën dhe Krimet (UNODC), sipas një komunikate të fundit të të cilës, Shqipëria mbetet një ndër arteriet e trafikut të drogës drejt Europës.
Lexo edhe:
Raporti italian. Në vitin 2011 janë paditur rreth 1.700 shqiptarë për trafik droge
OKB: “Shqipëria një nga portat kryesore të trafikut të drogës drejt Europës”
