Ja si do të jenë këtë vit “flukset e hyrjeve të punonjësve jokomunitarë”. Kuotat e vëna në dispozicion, dhe qarkorja e ministrive të Brendshme dhe të Punës
Romë, 1 shkurt 2016 – Janë pak më shumë se 30 mijë punonjësit e huaj që do të mund të përfitojnë nga dekreti i flukseve 2016, mes konvertimesh të lejeqëndrimeve dhe hyrjeve për punë nga jashtë, kryesisht sezonale.
Dekreti i Kryeministrit i 14 dhjetorit 2015, “Programimi kalimtar i flukseve të hyrjes së punonjësve jokomunitarë në territorin e Italisë për vitin 2016” do të botohet në Gazetën Zyrtare më 2 shkurt 2016, e menjëherë më pas do të nisë përpilimi dhe paraqitja e kërkesave, sipas këtij kalendari të paracaktuar. Le të shohim në detaje kuotat.
Hyrjet për punonjës jo sezonalë
1.000 punonjës të huaj që kanë përfunduar programe formimi dhe shkollimi në vendlindje sipas nenit 23 të dekretit legjislativ nr. 286 të 25 korrikut 1998”;
2.400 punonjës të pavarur (sipërmarrës që kryejnë aktivitet me interes për ekonominë italiane që do të angazhojnë burime financiare të ligjshme për të paktën 500 mijë euro e do të krijojnë të paktën tre vnede pune, profesionistë, figura të rëndësishme shoqërish private (jo kooperativa), artistë me famë ndërkombëtare apo me kualifikim të lartë profesional të kërkuar nga ente private e publike); qytetarë të huaj për ngritjen e sipërmarrjeve “start-up innovative” sipas ligjit 221 të 17 dhjetorit 2012, në prani të kritereve të parashikuara nga i njëjti ligj dhe në favor të të cilëve ka marrëdhënie pune e karakterit autonom me sipërmarrjen;
100 punonjës të pavarur apo të varur me origjinë italiane (pasardhës deri të shkallës së tretë) rezidentë në Argjentinë, Uruguaj, Venezuelë dhe Brazil:
100 punonjës nga vendet jo komunitare që morën pjesë në EXPO 2015 të Milanos.
Konvertime
Autorizohet konvertimi në leje qëndrimi për punë të varur i:
4.600 lejeqëndrimeve për punë sezonale;
6.500 lejeqëndrimeve për studime, praktikë pune dhe/ose formim profesional;
1.300 lejeqëndrimeve BE për qëndrues afatgjatë të lëshuar nga vende të tjera europiane.
Parashikohen gjithashtu edhe konvertime në lejeqëndrime për punë të pavarur të:
1.500 lejeqëndrimeve për studime, praktikë pune dhe/ose formim profesional;
350 lejeqëndrimeve BE për qëndrues afatgjatë të lëshuar nga vende të tjera europiane.
Hyrje për punë sezonale
Dekreti u hap dyert 13.000 punonjësve të varur sezonalë nga Shqipëria, Kosova, Mali i Zi, Maqedonia, Bosnje-Hercegovina, Algjeria, Egjipti, Filipine, Gambia, Gana, India, Japonia, Korea e Jugut, Maroku, Mauricius, Moldavia, Nigeri, Nigeria, Pakistan, Senegali, Serbia, Sri Lanka, Ukraina, Tunizia. Pavarësisht nga Vendlindja, do të pranohen edhe punonjës që kanë qenë në Itali vitet e fundit.
Për më tepër, 1.500 kuota nga 13 mijë të këtij dekreti u rezervohen punonjësve që kanë qenë këtu si sezonalë për dy vjet rresht e për të cilët punëdhënësit mund të paraqesin kërkesa autorizimesh shumëvjeçare.
Ja teksti i plotë i dekretit të flukseve 2016. Për të mësuar më shumë, mund t’i hidhni një sy edhe qarkores së përbashkët të ministrive të Brendshme dhe të Punës. Përveçse shpjegon në detaje të gjitha aspektet e dekretit, tregon edhe procedurën për paraqitjen e për shqyrtimin e kërkesave.
Lexo edhe:
Dekreti i flukseve 2016. Kalendari i kërkesave online, data e parë 3 shkurti
Dekret i ri fluksesh, thuajse i gjithi për punonjës sezonalë e konvertime lejeqëndrimesh
Shqiptari i Italisë
(Ndiqni Shqiptariiitalise.com edhe në Facebook dhe Twitter)
