Gjatë vitit që po mbyllet në jug të Shqipërisë janë ndaluar rreth dy mijë emigrantë që përmes vendit tonë dëshironin të shkonin në vendet e BE-së
Tiranë, 30 dhjetor 2013 – Mes mijëra emigrantëve shqiptarë që kthehen në vendlindje për të festuar festat e fundvitit, nga kufiri Shqipëri-Greqi hyjnë edhe emigrantë të paligjshëm nga vende të ndryshme të botës që duan të shkojnë në një nga vendet anëtare të BE-së, shpesh Itali. Policia kufitare e Gjirokastrës ndaloi të dielën 33 emigrantë nga Siria, Afganistani dhe Sudani. “Emigrantët ilegalë u ndaluan në orët e para të mëngjesit pranë fshatit Bulo, rreth 15 km larg Gjirokastrës”, thuhet në komunikatën e policisë.
Policia bëri të ditur se emigrantët, mes të cilëve kishte edhe tri gra, janë marrë në pyetje dhe kanë treguar se destinacioni i tyre ishte Italia. Sipas të dhënave të Drejtorisë Rajonale të Kufirit dhe Migracionit, gjatë këtij viti rreth 2 mijë emigrantë të huaj janë ndaluar në jug të vendit.
(Ndiqni ShqiptariiItalise.com edhe në Facebook dhe Twitter)
