Bijtë e imigrantëve ngjiten në skenën e Festivalit të Sanremos. Për të kënduar së bashku “Italiano” të Toto Cutugnos
Romë 19 shkurt 2011 – Nata e tretë e festivalit të Sanremos, ajo e 17 shkurtit, i dedikohej 150 vjetorit të unitetit të Italisë. Gjatë saj artistët pjesëmarrës në garë por edhe të tjerë të ftuar kënduan këngët më të suksesshme të muzikës së lehtë italiane. Çasti më emocionues i mbrëmjes ishte padyshim paraqitja e himnit të Mamelit nga Roberto Benigni.
Nuk mungoi as “Italiano” e Toto Cutugnos e kënduar nga ky dhe Francesco Tricarico. Dhe pikërisht gjatë kësaj kënge hyri në skenë edhe kori i të rinjve, përfaqësues të brezave të dytë të imigrantëve, që bashkë me këngëtarët kënduan “lasciatemi cantare/ con la chitarra in mano/ …/ perché ne sono fiero/ sono italiano/ l’italiano vero”.
Gjatë prezantimit në fund të këngës, të rinjtë, të pyetur prej nga vijnë, nuk thanë vendlindjen e prindërve, por qytetet italiane ku jetojnë: Romë, Prato, Pistoia, Latina. Për të theksuar që nuk janë të huaj por qytetarët e rinj italianë.
