Propozimi i partisë SVP për Trentino Alto Adige. “Kush vjen nga Europa e Lindjes e flet gjermanishten më mirë se italianët”
Romë, 7 mars 2011 – kush kërkon kartën e qëndrimit në Trentino duhet të mbrojë edhe testin në gjuhën gjermane.
Është i bindur për këtë Oskar Peterlini, senator i Südtiroler Volkspartei, që ka paraqitur një projektligj në Senat për modifikimin e risisë së fundit të tekstit unik mbi imigracionin. Është fjala për normativën që prej dhjetorit të shkuar detyron të gjithë imigrantët që kërkojnë kartën e qëndrimit, t’i nënshtrohen testit të gjuhës italiane.
Peterlini kërkon që të shtohet një nen: “lëshimi i lejes së qëndrimit BE për qëndruesit afatgjatë në krahinën e Trentino Alto Adige-s të varet nga rezultati i një testi të njohjes së gjuhës italiane ose gjermane”. Një zgjedhje më shumë në krahinën me statut të veçantë ku si italishtja ashtu edhe gjermanishtja janë gjuhë zyrtare.
“Tek ne ka shumë punonjës të sektorit të turizmit që vijnë nga vende që njohin më mirë gjermanishten se italishten” nënvizon senatori. Ndaj, sipas tij, do të ishte mirë që të huajve t’u jepet mundësia të zgjidhnin të mbronin gjermanishten ose italishten për të qëndruar në territorin e krahinës.
Por një dyshim mbetet. Karta e qëndrimit e lëshuar në Trentino është e vlefshme për të gjithë Italinë. Testi, sipas qeverisë, duhet të certifikojë integrimin efektiv të të huajit. Jemi të sigurt që nëse i huaji shkon nga Trentino në Sardenjë apo Toskanë, do t’i nevojitet më shumë gjermanishtja se italishtja? Ndoshta do të ishte më mirë që në Trentino testi të bëhet për të dyja gjuhët?
EP
