“Costa Crocere” dhe “MSC” kanë shprehur interesim e tyre për një bashkëpunim të drejtpërdrejtë në sektorin e lundrimeve me kroçera turistike
Burime zyrtare të drejtorisë së Autoritetit portual, shpjegojnë se përfaqësues të lartë të agjencive të njohura “Costa Crocere” dhe “MSC” kanë mbërritur muajt e fundit në Durrës dhe kanë shprehur interesim e tyre për një bashkëpunim të drejtpërdrejtë në sektorin e lundrimeve me kroçera turistike.
Kalatat 7 dhe 8, që ndodhen pranë sheshit të trageteve do të jenë krejtësisht në dispozicion të ankorimit të krocerave me kapacitet 2.500-3.000 udhëtarë, shtuan burimet.
Që nga viti 2006 numri i kroçerave në portin më të madh të vendit ka ardhur duke u rritur. “Artania”, kroçera e fundit që ka mbërritur në portin detar më 11 nëntor të këtij viti, ka sjellë në vendin tonë 1.106 turistë, ndërsa kapaciteti mesatar i anijeve turistike që kanë mbërritur deri tani në portin detar arrin në 200-400 turistë gjithsej.
Ndërkaq përpunimi i mineraleve dhe qymyrit do të zhvendoset krejtësisht në kalatën 10, rikonstruksioni i plotë i së cilës do të përfundojë brenda disa muajsh. Thellimi i basenit dhe kanalit hyrës të portit që do të nisë vitin e ardhshëm do të ndihmojë lundrimin e kroçerave të mëdha turistike drejt Durrësit, thanë burimet portuale.
