Napolitano: “Italia është e interesuar që Shqipëria të ndikojë pozitivisht edhe në normalizimin e marrëdhënieve mes Kosovës dhe Serbisë”. Nishani falënderoi Napolitanon “për kontributin që Italia ka dhënë në momentet kyçe të historisë moderne shqiptare e në demokratizimin e Shqipërisë”
Romë, 29 dhjetor 2012 – Presidenti i Republikës, Bujar Nishani, i shoqëruar nga Zonja e Parë, Odeta, dhe anëtarë të Kabinetit gjatë vizitës së tij në Romë, u prit dje në një takim në Pallatin presidencial “Quirinale” nga Presidenti i Italisë, Giorgio Napolitano.
Pasi shprehu kënaqësinë e veçantë për këtë takim të ngrohtë dhe miqësor, Presidenti Nishani e falënderoi Presidentin Napolitano për kontributin që ai ka dhënë personalisht dhe të shtetit italian në momentet më kyçe të historisë moderne shqiptare, në demokratizimin e Shqipërisë dhe shprehu bindjen se marrëdhëniet e gjithanshme historike, politike, ekonomike dhe kulturore midis dy vendeve do të thellohen edhe më tej.
Kreu i Shtetit shqiptar evidentoi mbështetjen dhe mikpritjen që u ofroi qytetarëve shqiptarë shteti italian në momentet e një dëshpërimi të thellë pas rënies së regjimit të diktaturës dhe eksodit të shqiptarëve në Perëndim. Vlerësoi mbështetjen e vazhdueshme që Italia ka treguar ndaj agjendës evropiane të Shqipërisë, duke nënvizuar se Shqipëria dhe shqiptarët janë të qartë se objektivi i tyre për t’u integruar në Bashkimin Evropian është që të hyjnë në BE si kontribuues dhe jo si konsumatorë. Nishani theksoi se marrja e statusit të vendit kandidat është tashmë përgjegjësi e klasës politike shqiptare dhe shprehu bindjen se marrja e Presidencës së radhës së BE-së nga Italia në vitin 2014 do të ketë një impakt shumë të rëndësishëm në ecurinë e procesit të integrimit evropian të Shqipërisë. Presidenti Nishani vlerësoi bashkëpunimin e shumanshëm që ekziston ndërmjet dy vendeve në fushën ekonomike, bashkëpunimin ndërmjet policive kufitare dhe të shtetit dhe inkurajoi forcimin e bashkëpunimit bilateral duke ftuar sipërmarrësit italianë të investojnë në Shqipëri në fushën e energjetikës, turizmit, bujqësisë, etj.
Presidenti Italian Giorgio Napolitano nga ana e tij vlerësoi marrëdhëniet e shkëlqyera ndërmjet qeverive e institucioneve të tjera, duke çmuar lart edhe punën që diplomacitë e dy vendeve bëjnë për forcimin e marrëdhënieve mes dy vendeve. Napolitano vlerësoi rolin që Shqipëria ka luajtur dhe luan në rajon duke nënvizuar se Italia është e interesuar që Shqipëria të ndikojë pozitivisht edhe në normalizimin e marrëdhënieve mes Kosovës dhe Serbisë.
Dy Krerët e Shteteve ndanë mendimin se rritja e sigurisë dhe stabilitetit në rajon mund të realizohet më shpejt, nëpërmjet një bashkëpunimi më të koordinuar rajonal mes vendeve, bashkëpunimit të ngushtë, fqinjësisë së mirë, të cilat janë rruga e vetme për t’u integruar në Bashkimin Evropian.
Po dje, Presidenti i Shqipërisë, Nishani, dhe Presidenti i Italisë, Napolitano, vizituan ekspozitën “Thesaret e Trashëgimisë Kulturore Shqiptare”, e çelur në Kompleksin “Vittoriano”, në kuadër të veprimtarive kushtuar 100-vjetorit të Pavarësisë së Shqipërisë.
Të shoqëruar nga Drejtori i Institutit të Monumenteve të Kulturës, Prof. Apollon Baçe, Presidenti Nishani dhe Presidenti Napolitano panë nga afër objektet e trashëgimisë kulturore shqiptare të ekspozuara sipas epokave historike, që datojnë nga periudha e Neolitit (viti 6000 para Krishtit deri në shekullin e 18-të pas Krishtit).
Presidentët u njohën me eksponatet e ekspozitës, ku veçojmë stolitë e periudhës së Neolitit, skulpturat e Antikitetit, si Koka e Apollonit e shkollës së Praksitelit, epitafin e Glavenicës dhe pikturat e Onufrit, si dhe peizazhet turistike të Shqipërisë të ekspozuara përmes fotografish dhe videosh.
Presidenti Napolitano, të cilit në fund të vizitës në ekspozitë iu dhurua katalogu i saj, u shpreh se vlerat e veçanta të pasurisë kulturore shqiptare janë vlera dhe pasuri jo vetëm të Shqipërisë, por vlera dhe pasuri ndërkombëtare.
