Botohet në Gazetën Zyrtare dekreti i Ministrisë së Punës: punëdhënësit duhet të paguajnë 156 apo 300 € për çdo muaj përpara legalizimit të marrëdhënies së punës
Me një dekret të botuar më 8 shtator në Gazetën Zyrtare, Ministria e Punës dhe e Politikave Sociale ka përcaktuar shumat e kontributit forfetar që duhet të paguajnë punëdhënësit që nga 1 qershori deri më 15 gusht kërkuan legalizimin e marrëdhënieve të parregullta të punës (sipas nenit 103 të dekretligjit nr. 34 të 19 majit 2020, të njohur ndryshe si dekreti Rinisja).
Shuma e kontributit forfetar ndryshon sipas sektorit ekonomik për të cilët ishte i mundur legalizimi e “për çdo muaj apo pjesë muaji” punësimi të parregullt është:
I) 300,00 euro për sektorët e bujqësisë, mbarështrimit, blegtorisë, peshkimit e akuakulturës dhe veprimtarive të lidhura me to;
II) 156,00 euro për asistencë për persona me sëmundje ose aftësi të kufizuara;
III) 156,00 euro për punën shtëpiake.
Pagesa e shumës do të bëhet nga punëdhënësit me një formular F24, duke shënuar një kod tatimi që do të jepet së shpejti nga Agjencia e Tatim-taksave (Agenzia delle Entrate).
Dekreti i Ministrisë së Punës tregon edhe për çfarë do të prdoren këto para:
a) një e treta e kontributit do të shkojë në bilancin e shtetit si hyrje fiskale;
b) një e treta do t’i shkojë INPS-it si kontribute;
c) një e treta do t’i shkojë INPS-it për t’iu akredituar më pas punonjësve si shpërblim.
Së fundi, dekreti saktëson që shumat e kontributit forfetar nuk do të kthehen në rast se praktika e legalizimit hidhet poshtë apo nuk pranohet.
Për më shumë informacione rreth legalizimit të të huajve të parregullt shko në:
Speciale sanatoria 2020
Shqiptari i Italisë
(Ndiqni Shqiptariiitalise.com edhe në Facebook dhe Twitter)
