Depozitohet teksti i unifikuar: italian kush lind apo vjen në Itali që i mitur. Raportuesja Fabbri: “Mund t’ia dalim mbanë, Italia nuk i trembet shtetësisë së fëmijëve”
Romë, 30 korrik 2015 – Menjëherë italianë fëmijët që lindin në Itali nga imigrantë të rregullt rezidentë prej të paktën 5 vjetësh. Fëmijët e lindur këtu nga prindër të huaj që nuk plotësojnë këtë kusht, apo fëmijët e lindur tjetërkund por të ardhur në Itali para se të mbushin 12 vjeç, do të bëhen qytetarë italianë pasi të kenë frekuentuar shkollën për pesë vjet.
Janë këto pikat kryesore (“shpirti” sipas raportueses Marilena Fabbr, PD) i tekstit të unifikuar për reformën e shtetësisë i depozituar më 29 korrik në Komisionin e Çështjeve Kushtetuese e Dhomës së Deputetëve. Bashkon parimet e “ius soli të zbutur” me ato të “ius culturae”. Teksti tani pritet të diskutohet (dhe të modifikohet) në komision, për të kaluar më pas në Sallë.
Do të jenë prindërit ata që duhet të kërkojnë shtetësinë për bijtë me “deklarimin e dëshirës”. Nëse nuk e bëjnë, do t’u takojë fëmijëve të bëjnë zgjedhjen, me të mbushur moshën madhore do të kenë dy vjet kohë për të paraqitur kërkesën. Në të njëjtën mënyrë, kush është bërë shtetas italian për dëshirën e prindërve, nga mosha 18 deri në 20 vjeç mund të heqë dorë nga shtetësia italiane. Shtetësia e dhënë fëmijëve nuk do t’u japë të drejtën e shtetësisë prindërve.
Teksti përpiqet të lehtësojë edhe rrugëtimin drejt shtetësisë edhe të rinjve më të mëdhenj, atyre që sidoqoftë hyjnë në Itali “para se të mbushin moshën madhore”. Do të mund të kërkojnë shtetësinë italiane (por në këtë rast, nuk është automatike dhënia e saj) pas gjashtë vjetësh residencë të rregullt në Itali, por vetëm nëse kanë ndjekur një cikël shkollor, dhe kanë marrë diplomën përkatëse” ose një “rrugëtim shkollor apo formimi professional me marrjen e kualifikimit professional”.
Tani për tani mbetet jashtë reformës natyralizimi i të rriturve, që sot duhet të presin dhjetë vjet për të paraqitur kërkesën. Është vepruar në këtë mënyrë për të gjetur consensus sa më të gjerë të mundshëm në parlament, ku qëndra e djathtë deri më sot është reëguar e gatshme të diskutojë vetëm mbi rregulla të reja për të miturit. Nuk është e thënë, ama, që gjatë rrugëtimit të reformës në parlament të mos ketë ndonjë hapje edhe në këtë drejtim.
“Jam e bindur që ky propozim mund t’ia dalë mbanë, edhe me ndonjë përmirësim të mëtejshëm që mund të dalë në dritë gjatë diskutimit të amendamenteve në komision në shtator dhe në Sallë në javët pasuese” thotë Marinella Fabbri. “Shoqëria italiane, që jeton çdo ditë pranë familjeve të huaja rregullisht të pranishme në Itali, që çojnë fëmijët në shkollë dhe jetojnë bashkë me ne shpresat dhe problemet e Italisë së sotme, nuk i trembet shtetësisë së fëmijëve, atyre që rriten duke u ndier italianë”.
Do ta tregojë diskutimi mbi reformën nëse gjërat janë vërtet kështu. Por, ndërkaq, bashkëraportuesja e reformës Annagrazia Calabria, Forza Italia, ka lënë mandatin e saj si e tillë dhe njofton se do të kundërshtojë tekstin. “Për ne ekzistojnë vlera që nuk negociohen siç janë respekti, mbrojtja dhe krenaria e identitetit italian” ka shpjeguar Calabria, duke shpjeguar që “teksti nuk respekton disa nga këto parime“.
Stranieriinitalia.it/Shqiptari i Italisë
(Ndiqni Shqiptariiitalise.com edhe në Facebook dhe Twitter)
