Nga 11 deri më 13 shkurt u mbajt në Milano Asambleja Kushtetuese e grupimit politik të Gianfranco Finit, moment që shënon edhe lindjen zyrtare të partisë “E Ardhme dhe Liri për Italinë”. Në programin e forcës së re flitet edhe për imigracionin dhe ligjin e shtetësisë
Romë 15 shkurt 2011 – Lind zyrtarisht në mes të shkurtit, me asamblenë kushtetuese që u zhvillua në Milano, partia politike “E Ardhme dhe Liri për Italinë”, e udhëhequr nga kryetari i Dhomës së Deputetëve Gianfranco Fini.
Prej disa muajsh, Fini dhe grupimi i tij ishin larguar nga Populli i Lirive, partia e Silvio Berlusconit, që së bashku kishin themeluar. E Ardhme dhe Liri tani kërkon dorëheqjen e Berlusconit, të përfshirë në një sërë skandalesh, dhe zgjedhje të reja.
Programi i partisë së re flet edhe për imigracionin dhe për reformën e shtetësisë. Partia e Finit sulmon qeverinë, që vë gishtin kundër imigrantëve për të gjitha problemet e sigurisë në vend. Ajo kërkon të modifikojë rregullat për marrjen e shtetësisë italiane, duke favorizuar brezat e dytë: sipas kësaj force, bijtë e imigrantëve, të lindur e të rritur në Itali, nuk mund të konsiderohen të huaj. Tashmë duhet parë se si do të konkretizohen këto qëllime në veprimtarinë politike të Finit dhe të njerëzve të tij.
