Nga e marta 23 prill deri të dielën më 28 prill në Teatrin Vasciello të Romës Kledi Kadiu do të jetë protagonist në Contemporary Tango të kompanisë Balletto di Roma
Pas suksesit të korrur në Rai5 edhe me edicionin e tretë të “Progetti di Danza” Kledi Kadiu kthehet në teatër. Këtë radhë si protagonist në Contemporary Tango të trupës së Baletit të Romës.
Contemporary Tango, me regji e koreografi të Milena zullos, muzikë të Astor Piazzollas, do të shfaqet nga e marta 23 prill deri të dielën më 28 prill në Teatrin Vasciello të Romës. Përmes një gjuhe bashkëkohore, vepra përpiqet të rrëfejë një vallëzim: tangon sociale që gjithnjë e më shumë po përhapet në botë. Tangoja sociale e përjetuar jo vetëm si një vallëzim, me hapat e saj tipikë, por e aftë të përshkojë me muzikën e saj të gjitha kontinentet.
Vepra e krijuar nga kompania Balletto di Roma tregon përqafimin e tangos, brenda të cilit përmbushen nevojat, ëndrrat, dëshirat, një përqafim që secili shpreh duke e pasuruar me diçka tijën. E në këtë aspekt, është edhe më e vyer e më e veçantë pjesëmarrja e jashtëzakonshme e Kledi Kadiut, falë të cilit viriliteti që përmban ky lloj vallëzimi bëhet protagonist.
