Me rastin e 170-vjetorit të lindjes së Naim Frashërit, mundësohet leximi dhe shkarkimi online i veprës së tij të plotë
Tiranë, 25 maj 2016 – Biblioteka Kombëtare e Shqipërisë, me rastin e 170-vjetorit të lindjes së një prej figurave më të rëndësishme të rilindjes kombëtare shqiptare, Naim Frashëri, publikon sot editimin dixhital të veprave të tij, çka do të thotë se ato mund të shfletohen dhe shkarkohen në faqen zyrtare të BKSH-së.
Pas përvojës së suksesshme me tragjedinë shekspiriane, “Othello – Arapi i Venedikut”, Arkivi Dixhital i BKSH-së pasurohet me veprën e plotë të rilindasit Naim Frashëri, e cila mund të lexohet dhe shkarkohet nga të gjithë pajisjet kompjuterike, smartphone dhe tablet, duke pasur kështu mundësinë për ta pasur me vete krijimtarinë naimiane.
Sipas një njoftimi për shtyp të BKSH, janë 13 tituj të rinj që çelin shërbimin më të ri online që BKSH ofron: “Dëshira e vërtetë e shqipëtarëvet” (1904), “Bagëti e Bujqësija” (1886), “Lulet e verësë” (1890), “Istori e Shqipërisë” (1899). “Fletore e Bektashinjvet” (1908), “Dituritë për mësonjëtoret të para” (1888), “Qerbelaja” (1898), “Shqipëria” (1902), “Istori e përgjitheshme për mësonjëtoret të para” (1886), “Vjersa për mësoiëtoret e para” (1886), “Istori’ e Skënderbeut” (1898) “Mësime” (1894) si dhe “Gjithësija: (1895). Krahas tyre do të publikohen edhe përkthimi nga Naim Frashëri i këngës së parë të “Iliadës” (1896).
Arkivi Dixhital i Bibliotekës Kombëtare së fundmi është pasuruar me seksionin më të ri, “LIBRA”, në të cilin do të publikohen në format elektronikë libra të vyer të fondit arkivor të BKSH, duke i ardhur në ndihmë të gjithë studiuesve dhe përdoruesve të saj.
Si një pjesë e rëndësishme e fondit e-Albanica, që përfaqëson Bibliotekën Dixhitale Albanologjike të BKSH-së, krahas tyre janë përfshirë edhe tituj të rëndësishëm për historikun e periodikut shqiptar, si “Albania”, (1896-1913); “Dituria” (1909-1929), “Hylli i Dritës” (1921-1944) dhe “LEKA” (1929-1944), “Kalendari Kombiar” dhe “Përlindj’e Shqipëniës”.
Në këtë fond janë përfshirë edhe vepra të rralla të Bibliotekës Kombëtare, dorëshkrime, harta dhe periodikë, të shekujve XV-XIX në gjuhën shqipe dhe në gjuhë të tjera.
Prej 10 vitesh Biblioteka Kombëtare, përmes faqes së saj zyrtare, disa shërbime online si: Katalogët Online, Katalogët e Digjituar, Biblioteka Digjitale, e-Bibliografi, etj., duke realizuar vit pas viti rritje shumë të shpejtë të vizitorëve të saj.
