Kështu i deklaron presidentit Bamir Topi, presidenti i Këshillit Evropian, Herman Van Rompuy
Tiranë, 20 tetor 2010 – Presidenti i Shqipërisë, Bamir Topi, ka vlerësuar vizitën disa orëshe në Tiranë të Presidentit të Këshillit Evropian, Van Rompuy në Shqipëri si një mbështetje në rrugën e vendit tonë drejt Evropës.
Duke iu referuar fazës aktuale ku ndodhet Shqipëria në pritje të dy vendimeve historike, atë të liberalizimit të vizave dhe të opinionit për marrjen e statusit të vendit kandidat, sipas ATSh-së, Presidenti Topi e informoi mbi intensifikimin e fushatës për sensibilizimin dhe njohjen e qytetarëve shqiptarë mbi procesin e liberalizimit të vizave, detyrimet dhe të drejtat që rrjedhin prej tij. “Ne jemi të vetëdijshëm për përgjegjësitë e angazhimet e mëdha që mbart ky vendim”, nënvizoi Presidenti Topi. Ai shprehu bindjen se “vota e Parlamentit Evropian në 7 tetor 2010, të cilën ne e përshëndesim, do të pasohet nga miratimi i Ministrave të Brendshëm të BE-së, në takimin e datës 8 nëntor 2010”.
Presidenti Topi u ndal dhe në çështjet e bashkëpunimit rajonal, duke nënvizuar rëndësinë e rritjes së intensitetit të këtyre marrëdhënieve mes fqinjëve, në kuadër të synimit të përbashkët, integrimit evropian.
Nga ana e tij, Presidenti i Këshillit Evropian, Herman Van Rompuy shprehu mbështetjen pa rezerva për të ardhmen evropiane të Shqipërisë, duke theksuar rëndësinë e vazhdimësisë së reformave integruese. Ai vuri në dukje nevojën për reforma më intensive në fusha si konsolidimi i mëtejshëm i institucioneve të pavarura demokratike, lufta kundër korrupsionit, shteti i të drejtës dhe mbrojtja e lirive e të drejtave të njeriut si dhe përpjekjet për një qeverisje edhe më të mirë.
