Kolegji Zgjedhor rrëzon kërkesën e PS-së për pavlefshmërinë e zgjedhjeve
Tiranë, 8 korrik 2011 – Kolegji Zgjedhor rrëzoi paraditen e së premtes kërkesë-padinë e depozituar më 2 korrik nga Partia Socialiste, që kërkonte shpalljen të pavlefshëm të vendimit të KQZ-së, që shpalli fitues me 93 vota kandidatin demokrat, Lulzim Basha, si dhe për pavlefshmëri në 284 qendra votimi në Tiranë.
Në një komunikim të shkurtër të vendimit, relatorja e çështjes, gjyqtarja Sashenka Jonuzi, tha se Kolegji rrëzoi kërkesën ankimore të PS-së për pavlefshmërinë e zgjedhjeve, duke argumentuar se padia e PS-së i ka tejkaluar afatet.
Në këtë mënyrë, me vendimin e sotëm të trupës së Kolegjit, mbetet në fuqi vendimi i KQZ-së i datës 25 qershor që shpall fitues kandidatin demokrat, Lulzim Basha, me 93 vota para ndaj kandidatit socialist, Edi Rama.
Përfaqësuesit e PS-së në seancën e Kolegjit janë larguar fill pas shpalljes të vendimit, duke mos dhënë deklarime për vendimin, ndërsa përfaqësuesit ligjorë të PD-së kanë thënë se PS nuk ka më hapësira ligjore për ankimim të vendimit për rezultatin e Tiranës.
Ambasadori i OSBE-së në Tiranë, Eugen Volfarth, është shprehur mbi vendimin e Kolegjit Zgjedhor për rrëzimin e ankesës së PS-së, gjatë një vizite në qytetin e Elbasanit. Ai ka thënë se tashmë palët duhet të respektojnë vendimin e Kolegjit dhe se pas këtij vendimi, është e rëndësishme administrimi i mirë i vendit: “Për OSBE/ODIHR është e rëndësishme dhe prioritare, respektimi i shtetit të së drejtës dhe ligjit në këtë vend” është shprehur ai.
Nga Brukseli, zëdhënësja e Kethrin Ashton, Maja Kocijancic në një deklaratë të shkurtër sqaron se Brukseli pret të shohë detaje të tjera të këtij vendimi, për të dhënë edhe opinionin e tij. “Kemi marrë shënim vendimin e Kolegjit, presim sqarime dhe justifikime për vendimin e Kolegjit për të dhënë edhe mendimin tonë”, sqaroi ajo.
