80-vjeçarja Shane Hoxha: “Doganierët grekë më përbuzën vendlindjen Çamëri”
“Njeriu duhet respektuar pavarësisht nga mosha, raca, apo ngjyra, më vjen keq që u trajtova në mënyrën më ofenduese nga dy shtetas grek dhe janë pikërisht këta që më vranë për të dytën herë në jetën time”, thotë 80-vjeçarja Shane Hoxha, e cila tre ditë më parë përjetoi një nga ngjarjet më të dhimbshme të jetës së saj. E ka përjetuar keq, kthimin e saj , nga pika doganore e Kapshticës, ndërsa ishte nisur për në Athinë tek vajza e cila sapo kish lindur një fëmijë. “Kjo që më ndodhi tre ditë më parë, më riktheu pas në mendime, atëherë kur isha 6 vjeç, kur na përzunë, na vranë, na plaçkitën, edhe ky gjest i doganierëve grekë ishte një vrasje e dytë për mua”, thotë 80-vjeçarja.
“Sapo kalova doganën shqiptare, u nisa drejt asaj greke, paraqita pasaportën dhe prita që doganieri grek të më vendoste vulën, por në fakt nuk ndodhi kështu”, rrëfen për ATSH-në, 80-vjeçarja. Ajo shton se “doganieri u çua nga karrigia dhe hyri në një zyrë, e doli prej andej me një dokument të shkruar në greqisht, ku thuhej se unë nuk mund të kalojë për në shtetin grek pasi vendlindja ime ishte Çamëri. Doganieri grek u shpreh se, ne nuk duam që çamët të kalojnë kufirin grek, nuk i duam çamët”.
Kaq ishte e gjitha, 80-vjeçarja u detyrua të kthehet sërish në Cërrik, aty ku ajo jeton që nga viti 1953.
Shane Hoxha ka ardhur në Shqipëri në vitin 1944, në vitin kur gjenerali Napoleon Zerva nisi të ushtrojë dhunë ndaj komunitetit çam, ku sërish me dhunë i përzuri drejt kufirit për në Shqipëri.
“Isha 6 vjeç ku së bashku me babain dhe me gjashtë motrat dhe vëllezërit e mi, morëm rrugën për të kaluar kufirin nga fshati Koskë ku banoja, shumë pranë Filatit kryeqytetit të Çamërisë dhe u vendosëm në Kavajë”, thotë 80 vjeçarja. “Kjo që më ndodhi, më riktheu pas në mendime, atëherë kur isha 6 vjeç, kur na përzunë, na vranë, na plaçkitën, edhe ky gjest i doganierëve Grekë ishte një vrasje e dytë për mua”.
“Ndjehem e fyer, nuk mund ta përballoj një fyerje të tillë në këtë moshë. Unë do të shkoja në Athinë tek vajza ime e cila lindi një fëmijë, dhe jo për të marrë tokat e mia. Nuk mund të bëj dot gjë, atë e ka në dorë qeveria shqiptare dhe ajo greke”, thotë e moshuara.
“Kam dëshirë të jetoj me fëmijët e mi, i kam në Greqi, dhe i lutem qeverisë shqiptare që të bëjë të pamundurën që edhe të drejtat tona, të komunitetit çam, të respektohen”, thotë Shane Hoxha, e cila tashmë jeton e vetme, pasi nuk ka mundësi që të qëndrojë pranë dy fëmijëve të saj që për më shumë se 10 vjet kanë ngritur familjen e tyre në Athinë të Greqisë.
