Dy ish të burgosurit e flijuar dërgohen njëri në Itali e tjetri në Greqi. Kryetari i socialistëve Rama falënderon autoritetet e vendeve fqinje për gatishmërinë
Romë, 12 tetor 2012 – Po shtrohet në poliklinikën e Barit për të marrë mjekim të specializuar një nga ish të dënuarit politikë që këto ditët e fundit i ka vënë flakën vetes. Është fjala për 47-vjeçarin Lirak Bejko që po sillet me një avion ambulancë që është çuar në Tiranë nga Italia.
Ndërkaq, Gjergj Ndreca 61 vjeç që i vuri flakën vetes pesë ditë më parë, gjithnjë gjatë të njëjtës grevë urije që ish të burgosurit politikë po bëjnë për të protestuar ndaj qeverisë për mos dhënien e kompensimeve, ka lënë në orët e para të mëngjesit të së premtes, repartin e djegieve në QSUT dhe është nisur drejt Greqisë për një shërbim me të specializuar në trajtimin e djegieve në një spital të Athinës.
Kryetari i Partisë Socialiste, Edi Rama, ka falenderuar autoritetet italiane dhe greke për gatishmërinë e tyre për të ndihmuar në kurimin e Gjergj Ndrecës dhe Lirak Bejkos. Mes të tjerash në komunikatën e PS-së thuhet që“Edi Rama falenderon në mënyrë të posaçme guvernatorin e rajonit të Puglia-s Nichi Vendola, administratën e tij dhe ambasadorin italian në Tiranë Massimo Gaiani, i cili me humanizëm të spikatur mundësoi kapërcimin në kohë optimale të të gjitha barrierave burokratike”.
