E diela e parë e korrikut shënoi një fluks të madh të qindra banorëve nga Kosova në drejtim të bregdetit shqiptar, e bashkë me të edhe nisjen e patrullimit të përbashkët të rrugëve të Shqipërisë nga policitë rrugore kosovare e shqiptare
Ka nisur më 1 korrik në akset kryesore rrugore zbatimi i marrëveshjes së nënshkruar mes policisë rrugore të Shqipërisë e policisë rrugore të Kosovës, për patrullimet e përbashkëta në rrjetin rrugor të vendit për sezonin turistik.
Fillimin e patrullimit të përbashkët e kanë dhënë paraditen e të dielës, në pikën e kalimit kufitar të Morinit, drejtuesit e policisë të të dyja shteteve, Vullnet Topalli dhe Sheremet Ahmeti, të cilët përcaktuan të gjitha detajet e shpërndarjes së patrullave të përbashkëta.
“Patrullimi i përbashkët synon një kontroll më efikas në të gjitha akset rrugore me synim lehtësimin e lëvizjes drejt bregdetit” – u shpreh drejtori i policisë rrugore shqiptare, Vullnet Topalli. Ndërsa drejtori i divizionit të policisë rrugore të Kosovës, Sheremet Ahmeti tha se një bashkëpunim i tillë jo vetëm minimizon rastet e aksidenteve, por krijon rritjen e bashkëpunimit dy palësh për zgjidhjen e të gjitha problemeve që dalin në këtë periudhë kur fluksi i lëvizjes në të dy anët rritet ndjeshëm.
Patrullimet e përbashkëta do të jenë më të fokusuara në rrugët kombëtare të cilat lidhin bregdetin shqiptar me rajonet e tjera të vendit nga ku fluksi i hyrjeve të shtetasve të huaj është edhe më i madh e ku mundësia e aksideneteve është më evidente.
Ky është viti i tretë që policia e Kosovës dhe ajo e Shqipërisë vendosin që të bashkëpunojnë në drejtim të kontrollit të lëvizjes së mjeteve në akset kryesore rrugore. Këto patrulla do qëndrojnë 24 orë në rrugë dhe do punohet me tre turne me qëllim që të shmangen aksidentet rrugore për shkak të numrit të lartë të pushuesve që i drejtohen bregdetit shqiptar për të kaluar pushimet.
Në fakt, e diela e parë e korrikut shënoi një fluks të madh të qindra banorëve nga Kosova në drejtim të bregdetit shqiptar. “Gjatë 24 orëve të fundit kanë hyrë në Shqipëri rreth 14 mijë persona, ndërsa kanë hyrë në Kosovë 10.700 persona, kryesisht shtetas kosovarë që kthehen në vendlindje për pushime”, pohojnë burime zyrtare të policisë kufitare.
Pavarësisht fluksit që po shënohet gjatë këtyre ditëve, deri tani nuk ka pasur radhë të gjata në doganën e Morinit përmes së cilës hyjnë në Shqipëri pjesa më e madhe e kosovarëve që dynden për pushime drejt bregdetit shqiptar.
Autostrada Morin-Kukës-Durrës ka bërë që fluksi në fundjavë të rritet ndjeshëm, pasi jo pak kosovarë kalojnë fundjavat në bregdetin shqiptar. Rexhep Zylfia nga Dragashi thotë për ATSh-në se “këtë periudhë na është bërë zakon t’i kalojmë fundjavat në bregdet, sepse udhëtimi nuk zgjat më shumë se 3 orë”.
