Mbërrin në Sallë teksti i unifikuar i miratuar në Komisionin e Çështjeve Kushtetuese. Rrezikojnë të mbeten jashtë reformës të rinjtë e lindur dhe/ose të rritur në Itali që tashmë janë në moshë madhore. Ja teksti i përditësuar
Romë, 28 shtator 2015 – Ka nisur sot pasdite e do të vazhdojë edhe në ditët në vijim diskutimi mbi reformën e shtetësisë për bijtë e imigrantëve, të ashtuquajturat breza të dytë.
Teksti i unifikuar i dalë nga Komisioni parashikon të jenë italianë fëmijët e lindur këtu vetëm nëse një prej prindërve ka kartën e qëndrimit. Përndryshe, ashtu si edhe fëmijët që nuk kanë lindur në Itali por kanë mbërritur këtu brendamoshës 12-vjeçare, duhet të ndjekin më parë një apo më shumë cikle shkollore për të paktën 5 vjet dhe, nëse është fjala për filloren, ta përfundojnë me rezultate pozitive.
E të rinjtë më të mëdhenj në moshë? Ata që mbërrijnë para se të mbushin 18 vjeç do të bëhen italianë pas 6 vitesh rezidencë të rregullt e pasi të kenë ndjekur e përfunduarnjë cikël shkollor apo një rrugëtim shkollimi e formimi professional trevjeçar ose katërvjeçar.
Tani për tani teksti nuk parashikon norma kalimtare për djemtë e vajzat e lindur apo të rritur këtu që ndërkaq kanë mbushur moshën madhore. Nëse në Dhomën e Deputetëve nuk do të gjendet edhe për ta një zgjidhje, reforma për brezat e dytë do të vlejë vetëm për një pjesë të bijve të imigrantëve duke sjellë një pabarazi trajtimi edhe mes vëllezërish e motrash të të njëjtës familje.
Mungojnë në reformë edhe normat që kanë të bëjnë me natyralizimin e imigrantëve të rritur, që sot duhet të banojnë rregullisht në Itali prej të paktën 10 vjetësh para se të aplikojnë për shtetësinë italiane.
Pas ilustrimit të tekstit dhe diskutimit mbi linja të përgjithshme, do të kalohet në shqyrtimin dhe votimin të neneve një nga një dhe të amendamenteve të paraqitura nga deputetët. Do të përfundohet me deklarimin e votës dhe votimin final. Më pas teksti do t’i përcillet Senatit.
