“Spartiti per Scutari Orchestra” e drejtuar nga Bardh Jakova, që prej disa vjetëve përhap muzikën shqiptare nëpër Itali, për të parën herë jep koncert në Shqipëri, pikërisht në qytetin të cilin mban edhe në emër
Romë, 20 gusht 2014 – Kur dhjetorin e shkuar folëm me Bardh Jakovën e miqtë e tij me rastin e daljes në treg të “Qui è sempre primavera”, albumi i parë i orkestrës Spartiti per Scutari, shpreheshin të lumtur për realizimin e diskut por dëshira e tyre e madhe mbetej të mund të jepnin një koncert në Shkodër.
“Spartiti per Scutari Orchestra” po realizon tani këtë ëndërr të bukur: pas koncerteve të suksesshme nëpër qytete të ndryshme të Italisë, po bëjnë një turne në Ballkan. Orkestra e drejtuar nga fizarmoniçisti Bardh Jakova jep sonte koncert në Shkodër pas atyre në Prizren (më 18 gusht) dhe Gjakovë (më 19 gusht).
Spektakli në Shkodër do të jetë një emocion i veçantë për të gjithë “Spartiti per Scutari Orchestra” që qytetin e mban edhe në emër, dhe në veçanti për Bardhin që kthehet në shtëpi me një “dhuratë” të madhe për vendlindjen e tij e për veten.
Orkestra ka lindur shtatë vjet më parë në Forlì në formën e një laboratori, falë vullnetit të Bardh Jakovës, që është ushqyer me muzikën e bukur shqiptare që i vogël. I rritur në një familje artistësh shkodranë, bir i Çesk Jakovës dhe nip i Prenkë Jakovës, Bardhi është diplomuar në fizarmonikë, qoftë në Tiranë, qoftë në Pesaro. Dashurinë e tij për muzikën tradicionale shqiptare ka ditur ta përcjellë më së miri në Itali ku jeton, fillimisht nxënësve të tij e më pas miqve duke i përfshirë në një laborator muzikor të kthyer sot në orkestër që ka nga 15 deri në 20 muzikantë që në sheshet e qyteteve italiane kanë bërë për vete publikun e gjerë me muzikën shqiptare e ballkanike. Është emocionuese të dëgjosh në sheshe të Emilia Romanjës, Friulit, Markeve, Taskanës apo Valle D’Aostës, të rinj italianë që këndojnë këngë si “Mora mandolinën”, “Nënë portokalle moj”, “Shkoj e vij fluturim si zogu”. “Nuk e kanë pasur të lehtë të shqiptojnë fjalë në gjuhën tonë – tregon Bardhi për shqiptariiitalise.com – por i futen punës me pasion me pasion e ia dalin mbanë”. Më së miri, do të shtonim, kur sheh veçanërisht shqiptarët që këndojnë apo hedhin valle ndërsa Bardhi, Gioele, Sara, Ilaria, Marcello, Angelo, Simone, Giulio, Roberta, Paolo, Pino, Fabrizio, Sabina, Fabio, Sabina performojnë live.
“Spartiti per Scutari Orchestra” ka një repertor të larmishëm që shkon nga këngët kosovare te vallet e jugut të Shqipërisë, duke kaluar përmes muzikës shkodrane, dibrane, vlonjate, beratase, korçare e pjesëve origjinale të kompozuara nga vetë Bardhi. “Njihja ndonjë pjesë tradicionale shqiptare – thotë Gioele Sindona, violinist profesionist, nëndrejtor artistik i Spartiti per Scutari – por me Bardhin kam pasur mundësi të njoh më mirë muzikën tuaj. Më mahnit shumëllojshmëria e pasuria muzikore që ka një territor relativisht i vogël si Shqipëri. Do të më pëlqente shumë të vizitoja edhe fizikisht Vendin, që deri më sot kam “shëtitur “ vetëm virtualisht përmes muzikës, e aftë të ngjallë tek unë ndjenja, vende e situata të panjohura”.
Lexo edhe: La primavera degli Spartiti per Scutari
K.B. Shqiptari i Italisë
(Ndiqni Shqiptariiitalise.com edhe në Facebook dhe Tëitter)
