Këshilli i Ministrave i vendeve anëtare të Bashkimit Europian pritet të vendosë sot për statusin e vendit kandidat për Shqipërinë.
Tiranë, 24 qershor 2014 – Qeveria shqiptare është sot në ethet e pritjes së vendimit për statusin e vendit kandidat për në Bashkimin Europian, që do t’i hapte ‘dritën jeshile’ nisjes së negociatave për integrimin e Shqipërisë në BE.
Pas dy ditëve mbledhje në Luksemburg, ministrat e Jashtëm të Bashkimit Europian shqyrtojnë zyrtarisht sot raportin për statusin e kandidatit për Shqipërinë, në Këshillin për Çështjet e Përgjithshme që përgatit dhe konkluzionet për samitin europian të krerëve të shteteve dhe qeverive të BE-së.
Në fillim të këtij muaji, Komisioni Europian i rekomandoi Këshillit të Ministrave të BE-së dhënien e statusit kandidat për Shqipërinë.
Në raportin e publikuar më 4 qershor mbi ecurinë e reformave shqiptare gjatë këtyre 6 muajve, u dhanë gjykime pozitive lidhur me zbatimin e prioriteteve të qeverisë shqiptare me forcimin e drejtësisë, luftën kundër korrupsionit dhe krimit të organizuar, mbrojtjen e të drejtave të njeriut, reformat në administratë etj.
Ndërkohë qeveria shqiptare është e angazhuar në përmbushjen e reformave evropiane.
Vendet anëtare të Bashkimit Europian kërkuan në muajin dhjetor më shumë kohë për të gjykuar mbi ecurinë e reformave në Shqipëri, sidomos forcimin e ligjit, luftën kundër korrupsionit dhe krimit të organizuar.
