“Adriatik 1” i nisur mbrëmë nga porti i Barit pritet të mbërrijë pasdite në Durrës, pas shumë orëve vonesë. Mes pasagjerëve edhe presidenti Bamir Topi
Durrës, 18 korrik 2012 – Pas një avarie në sistemin e filtrimit të karburantit, trageti “Adriatik 1”, i linjës Bari-Durrës, pritet të mbërrijë me vonesë, të paktën 6-7 orë, ku mes udhëtarëve të shumtë që udhëtojnë me këtë traget, mësohet se është edhe Presidenti i Republikës, Bamir Topi që kthehet nga Cellino San Marco ku ishte i ftuar special i festës “Shqipëri-Itali, miqësia mes dy popujve” gjatë të cilës u prezantua një libër me autor shqiptar për Al Bano Carrisin. Topit, si Presidenti i Republikës, i ka mbetur më pak se një javë, pasi me 24 korrik këtë detyrë do ta marrë presidenti i zgjedhur, Bujar Nishani.
Kapiteni i portit të Durrësit, Hysni Aruçi ka shpjeguar për ATSh-në se, “trageti është nisur mesnatën e kaluar nga porti i Barit dhe gjatë udhëtimit ka patur një avari, pas së cilës shpejtësia e lundrimit është ulur ndjeshëm”. Në këto kushte, trageti “Adriatik 1” do të mbërrijë pasdite – shtoi kapiteni Aruçi, sipas të cilit një nga rimorkiatorët e mjeteve detare është nisur nga porti për të lehtësuar lëvizjen e tragetit drejt Durrësit, ndërkohë që tre tragetet e tjerë, të së njejtës linjë detare “AF Claudia Prima”, “Adriatica Queen” dhe “Bari”, kanë mbërritur në Durrës para orës 9.00 të mëngjesit.
