Punëdhënësit mund të aplikojnë për një nga 42 mijë kuotat e vëna në dispozicion për të sjellë në Itali punonjës sezonalë të huaj. Mund të përfitojnë edhe shqiptarë e kosovarë
Romë, 1 shkurt 2022 – 5 ditë pas fillimit të aplikimeve për punonjës të varur, të pavarur e konvertime, nga mëngjesi i sotëm (ora 09:00) punëdhënësit e interesuar për të sjellë e punësuar me kontratë sezonale të huaj që nuk jetojnë në Itali, mund të aplikojnë në në portalin e ministrisë së prendshme https://nullaostalavoro.dlci.interno.it përmes kodit identifikues SPID.
Ndryshe nga vitet e fundit, këtë radhë mund të aplikohet për të përfituar një kuotë deri më 17 mars 2022 dhe kërkesat do të trajtohen në rendin kronologjik të paraqitjes.
Dekreti i fundit i flukseve ka vënë në dispozicion plot 42 mijë kuota hyrjesh për punonjësit sezonalë në sektorët e turizmit dhe të bujqësisë që u rezervohen punonjësve nga Shqipëria, Kosova, Maqedonia e Veriut, Mali i Zi, Serbia, Algjeria, Bosnja-Herzegovina, Bengali, Korea, Bregu i Fildishtë, Egjipti, El Salvadori, Etiopia, Filipinet, Gambia, Gana, Guatemala, Japonia, India, Mali, Maroku, Mauricius, Moldova, Nigeri, Nigeria, Pakistani, Salvadori Senegali, Sri Lanka, Sudani, Tunizia, Ukraina.
Nga këto 42 mijë kuota, 14 mijë, dhe vetëm për sektorin e bujqësisë, mund të kërkohen në emër të punëdhënësve nga organizatat profesionale të kategorisë: Cia, Coldiretti, Confagricoltura, Copagri, Alleanza delle cooperative (përfshin Lega cooperative dhe Confcooperative).
Së fundi, 1.000 nga 42 mijë kuotat u rezervohen autorizimeve shumëvjeçare, me fjalë të tjera, punonjësve që janë thirrur për të bërë punë sezonale në Itali, të paktën njëherë në pesë vjetët e fundit dhe për të cilët punëdhënësit mund të paraqesin kërkesa autorizimesh shumëvjeçare. Kjo do t’u lejojë ndërmarrjeve t’i sjellin në Itali vitet e ardhshme sapo të kenë nevojë për ta, pa pritur një dekret fluksesh.
Mbi të njëjtën temë lexo edhe:
Mbërrin dekreti i flukseve. 70 mijë kuota për punonjës të huaj sezonalë e jo sezonalë
12 janar 2022 – Nga sot përpilimi online i kërkesave
27 janar 2022 – Nis paraqitja e kërkesave online për punonjës të varur jo sezonalë, të pavarur dhe për konvertimet
