Sipas raportit paraprak mjeko-ligjor të kryer nga autoritetet franceze, mbi të nuk është ushtruar dhunë, por mendohet se duke humbur orientimin në pyll, të ketë vdekur si pasojë e dehidratimit.
Prishtinë, 25 korrik 2012 – Trupi i pajetë i poetit Ali Podrimja mbërrin të enjten paradite në Kosovë. Raporti mjeko-ligjor i kryer nga autoritetet franceze thekson se mbi të nuk është ushtruar dhunë, por mendohet se duke humbur orientimin në pyll, ka vdekur si pasojë e dehidratimit.
“Poetin e madh kosovar, Ali Podrimja, nuk e ka vrarë askush, as nuk ka bërë vetëvrasje. Vdekja dyshohet të jetë si pasojë e dehidratimit”. Kështu kanë thënë për gazetën Express, burime të afërta.
Tashmë autoritetet franceze vetëm se kanë përfunduar procesin e autopsise dhe sipas rezultateve, mbi trupin e tij nuk janë vërejtur shenja dhune apo sulmi.
Express ka mësuar se raporti i autopsisë nuk pritet të mbërrijë në Kosovë para dy javësh, për shkak të procedurave ligjore që duhen zbatuar.
Por në të njëjtën kohë, trupi i pajetë i poetit nuk do të presë kaq gjatë që të varroset në vendlindjen që e deshi aq shumë, e të cilës i kushtoi krijimtarinë e tij.
Podrimja është gjetur i vdekur në Francë disa ditë më parë ku po qëndronte në Francë në kuadër të festivalit të poezisë “Voix de la Méditerranée” në qytetin e Lodève. I kishte humbur kontaktet me zyrtarët dhe kolegët e festivalit që nga 17 korriku në mbrëmje, ndërsa me familjarët dhe kolegët në Prishtinë, kishte kontaktuar për herë të fundit me 18 korrik në mëngjes.
