Ortekë në rrethin e Kukësit
Valë ortekësh kanë rënë rreth mesditës të së shtunës në grykën e Vanave të rrethit e Kukësit, përmes së cilit kalon edhe aksi rrugor që lidh qytetin e Kukësit me zonën e Shishtavecit.
Ortekët kanë rënë që nga tuneli i parë, rreth 7 kilometra larg qytetit të Kukësit dhe janë shtrirë disa kilometra. Burime zyrtare të policisë lokale pohojnë se vala e ortekëve ka rrezikuar edhe dy makina me udhëtarë, por që kanë mundur të zbresin e të rikthehen në banesat e tyre.
Për kontrollin e situatës pranë vendngjarjes kanë mbërritur edhe forcat e policisë e të ushtrisë, të cilat kanë ndihmuar lëvizjen e 7 udhëtarëve që udhëtonin në këmbë drejt qytetit të Kukësit. “U kemi kërkuar banorëve të kësaj zone të mos lëvizin pasi rënia e ortekëve vazhdon, ndaj lëvizja në këtë situatë është mjaft e rrezikshme”,- pohojnë burime zyrtare të policisë lokale.
Në orët e paradites përmes kësaj gryke disa banorë të fshatit Lojme kanë sjellë deri te ura e uzinës një grua e cila më pas është transportuar me mjetet e policisë drejt maternitetit të qytetit të Kukësit.
