Sky i kërkon Antitrust-it që të merren në konsideratë edhe të huajt për përllogaritjen e shikueshmërisë së programeve tv
Çfarë ndjekin emigrantët në televizion? Vështirë ta thuash, nga çasti që për Auditel-in, shoqërinë që llogarit përqindjen e shifrat e popullsisë që ndjekin emisionet tv emigrantët nuk ekzistojnë.
Auditel ka instaluar në shtëpitë e mëse 500 mijë familjeve italiane një aparaturë që verifikon sa janë me televizor ndezur e ç’po shohin. Por kampioni është zgjedhur nga listat e personave që kanë të drejtën e votës në Itali dhe ky kriter ka lënë jashtë loje të huajt.
Me këtë çështje po merret Antitrust-i, autoriteti që duhet të garantojë respektimin e konkurrencës së lirë, pas sinjalizimit të Sky-t. Televizioni satelitar është i mendimit që përllogaritja e ndjekjes së progameve tv nuk është transparente dhe favorizon dy polet e mëdha televizive, Rai dhe Mediaset.
Të mos merren parasysh 5 milionë të huajt që jetojnë në Itali është, sipas Sky-t, një e metë e sistemit. Interesat në lojë janë të mëdha, pasi mbi të dhënat e Auditel-it, bëhen investimet publicitare. Hetimi i Antitrust-it do të zgjasë deri në fund të vitit, më pas do të mësohet nëse duhet të konsiderohen dhe në ç’masë telespektatorët emigrantë në Itali.
