Ka nisur diskutimi i projektligjit që do të ndalojë veshjen në publik të burkës, nihabit, perçes dhe të tjera vello që mbulojnë fytyrën me origjinë etnike dhe kulturore. Relatorja Sbai (PdL): “Betejë për të drejtat e për lirinë e grave”. Zaccaria (PD): “Nuk e votojmë, është antikushtetuese”
Romë 26 tetor 2011 – Ka nisur më 24 tetor në Dhomën e Deputetëve e do të vazhdojë në ditët në vijim diskutimi mbi projektin e ligjit që ndalon shprehimisht përdorimin në publik të vellos integrale. Teksti i unifikuar i sjellë në Sallë pas thuajse dy vjetësh nga diskutimi në Komision ndalon mbulimin në vende publike të fytyrës me vello të çdo lloji, “përfshirë ato me origjinë etnike dhe kulturore, si burka dhe nihabi”. Të vetmet përjashtime diktohen nga motive shëndetësore apo profesionale apo të lidhura me manifestime sportive, artistike ose tradicionale.
Kush nuk respekton ndalimin rrezikon nga 300 deri në 500 euro gjobë, që mund të transformohet nga gjyqtari në punë të detyruar falas për shoqata që merren me integrimin. Më të ashpra dënimet për ata që detyrojnë dikë të mbulojnë fytyrën, vepër penale e dënueshme me heqje lirie deri në një vit, gjobë që mund të arrijë deri në 30 mijë euro dhe hedhjen poshtë automatikisht të një kërkese të mundshme për shtetësinë italiane.
Më 24 tetor, relatorja Souad Sbai (PdL) foli për “një nevojë urgjente, për t’i bërë ballë vullnetit të kontrollit që disa lobby ekstremiste dëshirojnë të ushtrojnë mbi imigrantet e besimit mysliman në Itali. Nuk mund të fshehim faktin që pas kërkesës normative të ndalimit të veshjeve burka e nihab ekziston një univers të drejtash të mohuara të grave, vuajtjesh të papërshkrueshme dhe bllokim të lirive për gratë”.
“Për ne – shtoi legistja Maria Piera Pastore – përdorimi i burkës dhe i nihabit nga gratë që ndodhen në vendin tonë përfaqëson një formë dhune, përfaqëson fyerje për gratë përfaqëson një lloj kontrasti me atë çka thotë Kushtetuta në nenin 51, me të cilin parashikohet barazia mes burrave e grave dhe dinjiteti i barabartë mes burrave e grave”.
Flavia Perina (FLI, forca e Gianfranco Finit) kundërshton duke thënë që “nëse po flasim për të drejta e liri qytetare dhe, në njëfarë mënyre, kemi përcaktuar gratë si viktima të kësaj situate e të një detyrimi, është vërtet e çuditshme të imagjinohet të sanksionohet një viktimë për një përgjegjësi që mesa duket nuk është e saja, sikur të ishte ajo përgjegjëse për veprën penale. Kjo është një kontradiktë. E nuk e di se ku mund të na çojë: gratë e mundshme që do të sanksionoheshin në këtë kontest çfarë do të bëjnë? Do të jenë gra më të lira apo do të jenë gra që do të mbyllën mes katër mureve të shtëpisë?”.
Paola Binetti (UDC) është e mendimit që “të ndalosh burkën dhe nihabin nuk do të thotë asgjë, e akoma më pak nuk del në dritë madhështia e të drejtës së grave për kushte barazie në aftësinë e vet të vetëvendosjes”. Ndërsa në të vërtetë, vë në dukje Rosa Vellecco Calipari (PD), “kjo normë ka meritën e madhe të ngritjes së një katedraleje në shkretëtirë, pasi nuk shoqërohet nga asgjë: nuk ka propozime paralele apo të ndërlidhura që të kenë për qëllim forcimin e politikave të integrimit apo të dialogut ndërkulturor”. Sipas Roberto Zaccaria (PD), “referimi i drejtpërdrejtë ndaj nihabit dhe burkës është antikushtetues. Të përmendësh një veshje të lidhur me një tip të veçantë kulture apo besimi fetar, për ndokënd, është antikushtetuese dhe diskriminuese. Nuk besoj se mund të votojmë ndonjëherë pro një norme të tillë, sepse vizioni ynë është një ligj i përgjithshëm mbi lirinë e besimit fetar”.
